اسلام آباد ۔ 15 فروری (اے پی پی) صدرمملکت ممنون حسین آکھیے جو پاکستان موقع دی سرزمین اے ،حکومت پاکستان بہترین قانون سازی دے ذریعے انہاں کوں مزید بہتر بنڑایا جیں نال پوری دنیا دے سرمایہ کار فائدہ چا سگدن ،اساکوں خوشی تھیسی اگر اساڈے عزیز برادر ملک ترکی توں تاجر تے صنعت کار ایں توں فائدہ چاون ۔انہاں اے گال پاکستان ترک بزنس فورم دے وفد نال گال بات کریندے ہوئیں آکھی جنہاں خمیس کوں ترک سفیر احسان مصطفی یوردا قل دی قیادت اچ انہاں نال ملاقات کیتی ۔ایں موقع تے پاکستان تے ترکی دے سرمایہ کاراں دے علاوہ اعلیٰ حکام وی موجود ہن۔صدر مملکت آکھیا جو پاکستان تے ترکی دے تعلقات غیرمعمولی نوعیت دے ہن جیں دی مثال خارجہ تعلقات دی دنیا اچ ملنڑ اوکھی اے۔انہاں آکھیا جو ڈوہیں برادر ملکاں وچال مختلف شعبیں اچ تجارتی تے سرمایہ کاری اچ ودھاراتھیونڑں چاہیدے ۔ایں سلسلے اچ تاجراں ،صنعت کاراںتے سرمایہ کاراں دے وفداں دے تبادلے ضروری ان ۔صدر مملکت آکھیا جو پاکستان تے ترکی تاریخ ، ثقافت تے عقیدے دے پکے رشتے اچ گھنڈے ہوئے ہن ۔ صدر مملکت ایں تے خوشی دا اظہار کیتا جو پاکستان اچ سرمایہ کاری کرنڑ آلے ترک ادارے پاکستانی انجینئرز اتے کارکناں دی تربیت داخصوصی اہتمام کر یندے پن تے مزید تربیت سانگے انہاں کوں ترکی بھیجا ویندا پے ۔
