واشنگٹن ۔ 15 فروری (اے پی پی) امریکا اچ پاکستان دے سفیر اعزاز احمد چوہدری آکھیے جو پاکستان اتے امریکا جڈاں وی کٹھے رل تے کم کیتے اوندے چنگے نتیجے نکلین،پاکستان اتے امریکا کوں دہشتگردی دے خلاف رل تے کم کرنڑاچاہیدے،امید اے پاک امریکا تعلقات تیکھے معمول تے آ ویسن اتے ولا رل مل تے کم کریسن،امریکا اچ لاس اینجلس ٹائمز دے ادارتی بورڈ کوں انٹرویواچ پاکستان دے سفیر اعزاز احمد چوہدری داآکھنڑ ہا جو پاک امریکا تعلقات اینجھے مور تے آگن جیندی تلافی اوکھی تھیندی ویندی اے،امریکا نال تعلق پاکستان کیتے بہوں اہمیت رکھدے،ڈوہاں ملکاں ست ڈھاکیاں تئیں مل تے کم کیتے، اگو تے وی انہاں کوں رل مل تے ٹرنرڑدی لوڑھ اے۔انہاں افسوس کیتے جو ایں ویلھے پاکستان اتے امریکا اتحاد دی بجائے اختلافات کوں ودھاونڑ کیتے زور لیندے پن جیہڑی چنگی گال نئیں بھل امید اے جو اے حالات تیکھے چنگے تھیسن۔انہاں آکھیے جو ڈوہاں ملکاں دے تعلقات دی درجہ بندی نئیں کیتی وینج سگدی،افغانستان اچ استحکام کیتے حالی وی ڈوہیں کوں رل تے ٹرنڑ دی لوڑھ اے۔دہشتگردی مکاونڑ کیتے پاکستان بہوں قربانیاں ڈتن اتے وڈا کم کیتے،دہشتگردی دی کنڈھ بھنڑ پاروں ملک اچ امن اتے استحکام ڈسا پئے،جیکر اساں افغانستان کوں مستحکم نہ کیتا تاں خطرے مُکنر دی بجائے بیا ودھسن۔انہاں آکھیے جو پاکستان اچ اے سمجھیا ویندے جو افغانستان اچ ناکامی تے پاکستان کوں قربانی دا بکرا بنڑایا ویندا پئے۔اعزاز چوہدری آکھیے جو امریکا دے افغانستان اچ راہنر تے پاکستان خوش اے بھل امریکا کوں ایں سانگے حالی وی واضح پالیسی تے چلنڑ دی لوڑھ اے۔
