باشعور عوام آندے انتخابات اچ ولا مسلم لیگ ن دی حمایت کریسن،وزیراعظم

ڈیرہ غازی خان ۔ 31 مارچ (اے پی پی) وزیر اعظم شاہد خاقان عباسی ڈیرہ غازی خان اچ ناردرن بائی پاس اتے رارکھی گاج بوااٹہ سیکشن ون دے ڈو منصوبیاں دا افتتاح کیتے۔ایں موقع تے انہاں دا آکھنڑ ہا جو تساں لوکاں دی محبت ڈیکھ تے یقین اے جو آندے انتخابات اچ وی تساں مسلم لیگ ن کوں ہی حکومت کیتے چنڑسو،ایندے کیتے اسکوں رل تے محنت کرنڑی ہوسی۔انہاں آکھیے جو اے منصوبے ماضی دیاں حکومتاں وی بنڑا سگدیاں ہن بھل انہاں صرف جیباں بھرنڑ تے زور لائی رکھیے، کم کیتن تاں صرف نوازشریف کیتن،جیکر کہیں ملک دے مسائل حل کرنڑ دی کوشش کیتی اے تاں او نوازشریف اے۔انہاں آکھیے جو رکاونٹاں دے باوجود مسلم لیگ ن دی حکومت ملکی ترقی دا سفر نئیں رکنڑ ڈتا بھل سیاسی فیصلے غلط طریقے نال کرنڑ دی کوشش کیتی ویندی پئی اے حالانکہ اے حق عوام دا اے جو او اے فیصلہ اپنڑے ووٹ نال کرن، جیکر سیاسی اسٹتحکام نہ ہوسی تاں ملک کیویں ترقی کریسی؟وزیر اعظم آکھیا جو مسلم لیگ ن اپنڑی کارکردگی دی بنیاد تے عوام اچ ویسی،اساں کہیں تے الزام لائن نہ کہیں کوں گالھ مندا کڈھیے،گالھیں کڈھنڑ آلیاں کوں ہر کوئی جانڑدے، انہاں کولوں خیر دی توقع نئیں رکھنڑی چاہیدی۔وزیراعظم ڈیرہ غازی خان ایئر پورٹ سردار فاروق لغاری دے ناں نال منصوب کرنڑ دا اعلان کیتا۔ انہاں آکھیے وج ساڈے دور اچ جیڑی ترقی تھئی اے اوندی کتھائیں مثال نئیں ملدی، موٹرویز بنڑدے پن، توانائی اتے معاشی بحران ٹالیے، دہشتگردی مکا تے امن گھن آندے، ساڈے انہاں کماں دا اعتراف پوری دنیا منیدی اے۔انہاں آکھیے جو ڈیرہ غازی خان دے مسلم لیگی مقامی اختلافات ہک پاسے سٹ تے قومی مفاد دو دید کرن۔ انہاں سخی سرور سمیت کئی علاقیاں کیتے گیس دا اعلان کیتا۔انہاں آکھیے جو میکوں روکیا ویندے جو میں سینٹر اتے چیئرمین سینٹ بارے بیان نہ ڈیواں،میں این برائے دے خلاف ہر حد تئیں ویساں، منتخب سینیٹرز اتے چیئرمین سینٹ حلف ڈیون جو انہاں کوئی ووت مل نئین گھدا،کیا ضمیر ویچ تے جیباں بھرنڑ اتے ووٹ مل گھنر آلے ہنڑ عوام دے نمائندے ہوسن، انہاں عوام کوں اپیل کیتی جو او پاکستان دی ترقی اتے ووٹ دی عزت کیتے (ن) لیگ دی حمایت کرن۔