اسلام آباد ۔ 27 مارچ (اے پی پی) چیف الیکشن کمشنر جسٹس (ر) سردار محمد رضا دی سربراہی اچ الیکشن کمیشن آف پاکستان دی پلاننگ کمیٹی دا اجلاس منگل کوں اسلام آباد الیکشن کمیشن سیکرٹریٹ اچ تھیا جیں اچ چارے صوبائی الیکشن کمشنراں اتے چارے ممبران کمیشن سمیت اعلیٰ حکام شرکت کیتی۔ چیف الیکشن کمشنر جسٹس (ر) سردار محمد رضا سارے انتخابی مواد بشمول بیلٹ پیپرز دی خریداری تے تیاری دے کم تے اطمینان دا اظہار کیتا ۔اجلاس کوں سارے ملک اچ ووٹر لسٹاں دی تیاری تے ڈسپلے مرکز دے قیام تے بریفنگ ڈتی گی ۔اجلاس کوں ڈسایا گیا جو سارے ملک اچ ڈسپلے مرکز کم کریندے پن ۔24اپریل تئیں اے ڈسپلے مرکز عوام سانگے کھلیے رہسن ۔عوان سانگے ووٹ دے اندراج تے درستگی دا چھیکڑی سنہری موقع اے ۔اجلاس کوں ڈسایا گیا جو سارے ملک اچ آندے عام انتخابات سانگے 89ہزار 500پولنگ سٹیشن دی نشاندہی کر گھدی گی اے تاں جو اے تعداد ودھ وی سگدی اے ۔اجلاس کوں ڈسایا گیا جو تربیتی عمل وی شروع تھی گے ۔پہلے مرحلے اچ چارے صوبیں دے 95لیڈرٹر ینر دی تربیت پوری تھی گی اے ۔ڈوجھے مرحلے اچ ترائے ہزار ٹرینر کوں تربیت ڈتی ویسی ۔تریجھے تے چھیکڑی مرحلے اچ پولنگ اسٹاف اتے ڈسٹرکٹ ریٹرننگ افسراں تے ریٹرننگ افسران دی ٹریننگ تھیسی جیرھی جو مئی اچ شروع تھیسی ۔ اجلاس کو ں ڈسایا گیا جو پچھلے چھی مہینے اچ ضلعی ووٹر ایجوکیشن کمیٹیاں سارے ملک اچ 2209اجلاس ،واکس سیمینار کرائے ہن تاں جو عوام اچ ووٹ دے حوالے نال شعور کوں نشابر کیتا ونج سگے ۔ اجلاس کوں ڈسایا گیا جو 14 فروری کو ںنادرادے نال الیکشن کمیشن آر ٹی ایس سانگے معاہدے تے دستخط کیتے ہن۔ 2018دے انتخابات اچ آر ٹی ایس دے ذریعے پریزائیڈنگ افسر موبائل ایپلی کیشن دے ذریعے نتیجے وختی بھجوا سگسن ۔اجلاس کوں ڈسایا گیا جو سارے پولنگ سٹیشناں کوں گوگل دے نال جوڑیا ویسی تاں جو لوک گھر بیٹھے اپنڑے پولنگ سٹیشن بارے معلومات گھن سگسن ۔اجلاس کوں مزید ڈسایا گیا جو تریمت ووٹراں تے انہاں دے قومی شناختی کارڈ دے حوالے نال مہم 103 ضلعے اچ جاری اے ۔ چیف الیکشن کمشنر ایں موقع تے ہدایت کیتی جو ودھ توں ودھ تریمت ووٹراں کوں ووٹر لسٹ اچ شامل کیتا ونجے ۔
