اسلام آباد ۔ 29 مارچ (اے پی پی) وزیراعظم شاہد خاقان عباسی آکھیا جو حکومت تعلیم دے ودھارے سانگے ہر ممکن قدم چاونڑ تے تعلیمی شعبے اچ مسلیں دے حل سانگے پر عزم اے ۔انہاں اے گال گورنمنٹ بوائز کالج اتے گورنمنٹ ویمن کالج مری دے طالب علماں نال گال بات کریندے ہوئیں آکھی جنہاں خمیس کوں انہاں نال وزیراعظم آفس اچ ملاقات کیتی ۔اے ملاقات مختلف سرکاری تے نجی تعلیمی اداریں دے طالب علماں کوں وزیراعظم آفس اچ سڈنڑ تے ملک دے اعلیٰ ترین دفتراں دے امور کار بارے ڈساونڑ دے اقدام دا حصہ ہئی ۔ وزیراعظم کجھ وقت طالب علماں نال گزاریا تے تعلیم دے ودھارے سانگے حکومت کوششاں تے اٹھارویں ترمیم دے بعد تعلیمی شعبے اچ وفاقی تے صوبائی حکومتاں دے کردار سمیت مختلف موضوع تے انہاں دے سوالاں دے جواب وی ڈتے ۔
