اسلام آباد ۔ 9 مارچ (اے پی پی) صدر مملکت ممنون حسین آکھیے جو جمہوریت دے استحکام کیتے اداریاں اتے فریقین وچال اتفاق رائے اتے نظام دے تحفط سانگے آئینی ضمانتاں ضروری ہین،ساریاں سیاسی جماعتاں جھیڑے ہک پاسے سٹ تے جمہوری عمل کوں ٹورنڑ کیتے کردار ادا کرن۔اے گالھ انہاں اسلام آباد اچ اپنڑی مدت پوری کرنڑ آلے ادھے سینیٹراں نال الوداعی ملاقات دی تقریب اچ خطاب کریندے ہوئیں آکھی۔ تقریب نا ل چیئرمین سینیٹ میاں رضا ربانی، اسپیکر قومی اسمبلی سردارایازصادق،ڈپٹی چیئرمین سینیٹ مولانا عبدالغفور حیدری،قائدایوان راجہ ظفرالحق اتے قائد حزبِ اختلاف اعتزازاحسن وی خطاب کیتا۔تقریب اچ صدر مملکت سینٹ دی کارکردگی بارے کتاباں دا وی اجرا کیتا۔صدر آکھیے جو پارلیمنٹ کاروبارِ مملکت نمٹاونڑ، حکومت دا منڈھ رکھنڑ اتے کارکردگی تے اکھ رکھنر دا ادارہ اے جیکوں ریاست دے سارے ادارے جوابدہ ہین،آونڑ آلے ڈینہاں ایندے چنگے اثرات نکلسن۔صدر مملکت آکھیے جو سینیٹ دے انتخاب جمہوریت دے استحکام کیتے ہک وڈا سنگِ میل ہین،ایں سانگے لگنڑ آلے کجھ الزامات تشویشناک ہیں،ساکوں اینجھے اہم اتے حساس قومی معاملیاں تے ذمہ داری ڈکھاونڑی چاہیدی اے۔انہاں مشورہ ڈتے جو اینجھے معاملیاں کون متنازع بنڑاونڑ دی بجائے انہاں تے سنجیدگی نال غور کرنڑا چاہیدے جیکر لوڑھ ہووے تاں طریقہ انتخاب اچ وی تبدیلی کیتی ونجے۔ صدر آکھیے جیکر جمہوری نظام دے بنیادی اصول دی پاسداری نہ تھیسی تاں ایندے نال سسٹم دی خرابی پیدا تھیسی اتے کوئی وی حکومت کم نہ کر سگسی،ساریاں سیاسی جماعتان ذمہ داری نہ ڈکھائی تاں آپسی جھیڑیاں پاروں جمہوریت اتے سیاسی نظام کون نقصان پجسی۔صدر مملکت چیئرمین سینیٹ میاں رضا ربانی دی جمہوریت دی بقاءکیتے خدمات دی تعریف کیتی اتے امید کیتی جو ریٹائرڈ تھیونر آلے سینٹ ارکان اگو تے وی ملک کیتے خدمتان جاری رکھیسن۔
