اسلام آباد ۔ 12 مارچ (اے پی پی) مسلم لیگ (ن) چیئرمین تے ڈپٹی چیئرمین سینیٹ سانگے امیدواروں دا اعلان کر ڈتے جیں دے مطابق سینیٹر راجہ ظفر الحق چیئرمین سینیٹ تے سینیٹر عثمان خان کاکڑ ڈپٹی چیئرمین سینیٹ دا الیکشن لڑسن۔ سنوار کوں موسمیاتی تبدیلیاں دے وفاقی وزیر سینیٹر مشاہد اﷲ خان مسلم لیگ (ن) تے اتحادیاں تے مشتمل مشاورتی اجلاس دے بعد فیصلے دا اعلان کریندے ہوئیں آکھیے جو مسلم لیگ (ن)ولوں سینیٹر راجہ ظفر الحق چیئرمین سینیٹ تے سینیٹر عثمان خان کاکڑ ڈپٹی چیئرمین سینیٹ داالیکشن لڑسن۔ انہاں آکھیا ووٹ مل گھننڑ تے ویچنڑ آلے جمہوریت تے وفاق کوں ضیان پجیسن ۔ انہاں آکھیا اساکوں عمران خان تے افسوس ایں سانگے کائنی او پہلے ڈینھ توں انگلی تے ایمپائر دی سیاست کریندن ۔اساکوں افسوس پیپلز پارٹی تے ہے جنہاں ایں سارے عمل اچ ذوالفقار علی بھٹو تے محترمہ بے نظیر بھٹو دی وراثت کوں ضیان پجائے ۔ انہاں آکھیا ساریاں اتحادی جماعتاں اساڈے نال ہن ۔انشاءاﷲ مسلم لیگ (ن) کوں کامیابی مل ویسی ۔
