اسلام آباد ۔ 15 مارچ (اے پی پی)وفاقی وزیر داخلہ پروفیسر احسن اقبال آکھیے جو ملک اچ امن تے استحکام قائم کیتے بغیر ترقی تے خوشحالی دی منزل حاصل نی کیتی ونج سگدی ،2025تئیں پاکستان دا شمار دنیادیاں اگاتریاں 25معیشتاں اچ شامل تھی ویسی ،اساکوں ٹیکنالوجی دے نال قدم نال قدم رلا تے چلنڑاں ہوسی ،پاکستان اچ ہر چیز خراب کائنی اساں بہوں کامیابیاں وی حاصل کیتیاں ہن ،سارے ملک اچ ترقی دے منصوبے جاری ان ،دہشت گرد اج محاصرے اچ ہن تے اساں انہاں تے چڑھائی کیتی ہوئی اے جڈاں جو چار سال پہلے دہشت گرداں اساں تے چڑھائی کیتی ہوئی ہئی تے اساں محاصرے اچ ہاسے ،ہر ضلعے اچ یونیورسٹی کیمپس قائم کیتا ویسی ،لیپ ٹاپ فار آل سکیم شروع کیتی ویندی پئی اے ۔ہر طالب عالم کوں لیپ ٹاپ ڈتا ویسی ۔خمیس کوں اتھاں پاکستان انسٹیٹیوٹ فار کنفلکٹ اینڈ سکیورٹی سٹڈیز دے اہتمام نال ”قومیت تے پاکستانیت “ دے موضوع تے سیمینار توں خطاب کریندے ہوئیں انہاں آکھیا جو موجود ہ دور تکھے تھیندیاں تبدیلیاں تے بدلدی دنیا دا دور اے ،میڈی نسل دے لوکاں تختی تے سلیٹ نال ٹیب تے نوٹ بک تئیں دا سفر ڈٹھا اے ،اج سکولاں اچ تختی تے سلیٹ دی جاہ تے پی سیز تے فور جی ٹیکنالوجی استعمال تھیندی پئی اے ،اے سفر محض ڈو توں ترائے عشریں اچ طے تھیا اے ،ہر قوم اپنڑی ترقی دی رفتار تکھی کرنڑ دی کوشش اچ ہے ،ہک وقت ہا جڈاں عسکری طاقت تے قوماں دی ترقی دا انحصار ہئی ،اسلحہ میزائیل تے ٹیک دفاع دی ضمانت ہن لیکن اج کہیں قوم دی سلامتی تے ترقی دا دارومدار علم تے معیشت تے ہے ۔
