اسلام آباد ۔ 8 مارچ (اے پی پی) وزیراعظم شاہد خاقان عباسی آکھیے تریمتیں کوں انفرادی تے اجتماعی سطح تے معاشی، سیاسی، معاشرتی طور تے بااختیاربنڑاونڑ تے انہاں دی ترقی سانگے سازگار ماحول ڈیونڑ دیاں ساریاں کوششاں جاری رکھیسوں ۔او خمیس کوں تریمتاں دے عالمی ڈینھ دے موقع تے وزیراعظم آفس اچ تقریب نال خطاب کریندے پے ہن جیں اچ زندگی دے مختلف شعبیں نال تعلق رکھنڑ آلیاں تریمتاں شرکت کیتی ۔انہاں آکھیا تریمتیں کوں درپیش مسلے ،مختلف چیلنج تے سانجھیاں کوششاں نال حل تھیسن ۔وزیراعظم تریمتاں دے عالمی ڈینھ دے موقع تے سارے ملک دیاں تریمتاں کون سماجی، سیاسی، معاشی اتے زندگی دے بے شعبہ جات اچ حاصل تھیونڑ آلیاں کامیابیاں تے مبارخ ڈیندے ہوئیں آکھیا جو اے ڈینھ ایں عزم دی تجدید دا موقع اے جو اساں انفرادی تے اجتماعی طور تے اپنڑیاں ساریاں کوششاں چنگے انداز اچ جاری رکھیسوں تاں جو جتھاں اساڈیاں تریمتاں دے سماجی، معاشی، معاشرتی تے سیاسی حقوق دا تحفظ تھی سگے اتھاں انہاں کوں زندگی دے ہر شعبے اچ اپنڑیاں صلاحیتیاں دے مطابق اگی تے ودھنڑ دے موقع مل ویسن ۔ وزیراعظم شاہد خاقان عباسی آکھیا جو میکوں اے گال کریندے ہوئیں ودھ سارا فخر محسوس تھیندے جو پاکستان دیاں تریمتاں زندگی دے ہر شعبے اچ قومی تے بین الاقوامی سطح تے اپنڑیاں صلاحیتاں کوں منوائے ۔بعد اچ وزیراعظم شاہد خاقان عباسی تقریب اچ شریک تریمتیں دے مختلف گروپاں ڈے ونج تے قومی معیشت ‘ سیاست ‘ صحت ‘ تعلیم تے تریمتاں تے انہاں دے اثرات متعلق امور بارے گال بات کیتی ۔
