اسلام آباد ۔ 24 مارچ (اے پی پی) وزیراعظم شاہد خاقان عباسی آکھے جو اگر ترقی دی راہ اچ اڑنگیاں نہ گھتیاں ویندیاںتاں اج پاکستان دے حالات مختلف ہوندے، سید والا اتے بچیکی اچ گیس فراہمی دے منصوبے تے کم جاری ہے، اوکاڑہ۔ جڑانوالہ روڈ تے دریائے راوی تے رائے منصب علی خان پل بنڑاونڑ گزریل حکومت کیتا ، موجودہ حکومت ایں منصوبہ کوں اپنڑیاں ترجیحات اچ شامل کر تے فنڈزڈیونڑ یقینی بنڑایا ، موجودہ حکومت علاقہ دے عوام داپرانڑاںمطالبہ پورا کر ڈتے، عوام فیصلہ کریسی جو انہاں کوں کم کرنڑ آلی قیادت چاہیدی ہے یا مندے کڈھنر آلی قیادت،رائے منصب علی خان پل بنڑن نال علاقے دی معاشی اتے سماجی ترقی اچ نمایاں مدد ملسی ، مسلم لیگ (ن) دی حکومت کو ںعوام دی خدمت توں روکیانی ونج جا سگدا ، مسلم لیگ (ن) دی کارکردگی پورے ملک اچ ساریاں دے سامنڑے ہے، عوام آندے انتخابات اچ صحیح فیصلہ کر تے اپنڑی قیادت دا انتخاب کریسن۔انہاں خیالیں دا اظہارا وزیراعظم ہفتہ کوں ننکانہ صاحب دے نیڑے اتے وکیلاں دی کالونی تے رائے منصب علی خان پل دی افتتاحی تقریب نال خطاب کریندے ہوئیں کیتا ، پل بنڑن نال دریا دے سجھے پاسے جی ٹی روڈ آلے پاسے ونجنڑ آلی ٹریفک کوں سہولتاں ملسن اتے وڈی ٹریفک کوںجڑانوالہ ، ننکانہ صاحب، فیصل آباد ، جھنگ ، ٹوبہ ٹیک سنگھ ، چنیوٹ ، اتے سرگودھا دیاںاہم زرعی تے صنعتی مرکزاں تئیں رسائی ملسی۔ وزیراعظم شاہد خاقان عباسی آکھیا جو مسلم لیگ (ن) دی حکومت کو ںعوام دی خدمت توں روکیا نی ونج جا سگدا اتے خدمت اوہ بندہ کریندے جیندے دل اچ خلوص ہوئے ، دھرنے نہ دتے ویندے تاں اج پاکستان ترقی دیاں وڈیاں منزلاں طے کر گھندا ، اقتدار دی ہوس رکھنڑ آلے نہ تہ عوام دی اتے نہ ہی ملک دی خدمت کریندن ، پاکستان مسلم لیگ (ن) دی کارکردگی عوام دے سامنڑے ہے اتے محمد نواز شریف اپنڑی کارکردگی دی بنیاد تے عوام اچ کھڑے۔ وزیراعظم آکھیا جو اساں ملکی سیاست اچ اتفاق دی گالھ کیتی ، سیاست کو ںعزت ڈیونڑ دی گالھ کیتی پر ایندا جواب تساڈے سامنڑے ہے اتے آندے الیکشن اچ ہر باشعور پاکستانی اپنڑی قیادت دے انتخاب دا فیصلہ کریسی جیرھا جو مشکل فیصلہ کائنی ہے۔ انہاں آکھیا جو پاکستان مسلم لیگ (ن) اتے محمد نواز شریف اپنڑی کارکردگی دی بنیاد تے عوام اچ کھڑ ے، 2013ءاچ ملک اچ بجلی تے گیس دی شدید گھٹکی دا سامنڑاں ہا جڈانجو اج معیشت اتے ملک اچ حالات دی سنگینی تساڈے سامنڑے ہائی ۔ وزیراعظم آکھیا اساں دعویٰ نی کریندے اساں سارے مسئلیاں حل کر ڈتے ہن اتے مسئلے مکاونڑ سانگے خلوص نال کم کیتے جیندے نتائج ہنڑ تساڈے سامنڑے ہن۔ انہاں آکھیا جو گزریل 65 سالاں دے دوران 20 ہزار میگاواٹ بجلی پیدا کیتی گئی ہائی جڈانجو اساں موجودہ دور حکومت اچ 10 ہزار میگاواٹ بجلی قومی گرڈ اچ شامل کیتی ہے۔ انہاں آکھیا جو آندے گرمیاں دے سیزن اچ انشاءاللہ ملک اچ لوڈ شیڈنگ کائناں ہوسی تاں جو پوری دنیااچ کجھ تکنیکی مسئلے سامنڑے آندے راہندن اتے ایجھے مسئلے ہر ملک اچ تھیندے راہندن ۔ انہاں آکھیا اساںمقامی پیداوار اچ ودھارے دے نال نال گیس درآمد کر تے گھریلو صارفین، صنعتاں، سی این جی سٹیشناں اتے بجلی بنڑاونڑ آلے کارخاناں کوں گیس دی فراہمی یقینی بنڑائی ہے۔ وزیراعظم شاہد خاقان عباسی آکھیا جواوہ ملک جتھاں 10 لکھ ٹن یوریا کھاد درآمد تھیندی ہائی، ایں دفعہ اساں 6 لکھ ٹن یوریا کھاد برآمد کرنڑ دے نال نال ایندیاں قیمتاں اچ وی گھٹکی کیتی ہے۔ وزیراعظم آکھیا جوا ساکوں سمجھنڑ دی ضرورت ہے کیونجو اساڈے ملک اچ کم کرنڑ آلیاں کوں عزت نی ڈتی ویندی جڈانجوکم نہ کرنڑ آلیاں عزت ڈتی ویندی ہے۔انہاں آکھیاجو ماضی اچ کہیں این آر او دا سہارا گھد اتے کوئی حالات نال سمجھوتہ کر تے اپنڑے گھر بہہ گیا لیکن مسلم لیگ (ن) اصولاں تے ڈٹی ہوئی ہے، کہیں بندے کوں شک نی ہونڑ چاہیداجوپاکستان ترقی کرنی ہے تاں ایہ صرف جمہوریت نال ہی ممکن ہوسی جیندا فیصلہ تساں کریسو اتے جولائی دے آندے انتخابات اچ وی تساں فیصلہ کریسو۔ وزیراعظم آکھیا جو اساں عدالتی فیصلے من تے انہاں تے عملدرآمد کیتے اتے ہنڑ تریخ انہاں دا فیصلہ کریسی۔ انہاں آکھیا جو گزریل سال جولائی اچ نواز شریف عدالت دے فیصلہ دی روشنی اچ حکومت چھوڑ ڈتی، ہنڑ عوام آندے انتخابات اچ فیصلہ کریسن۔ وزیراعظم آکھیا جواساڈے سیاسی مخالفین وی ایں گالھ کوں منیدن جو بئے صوبیاں دے مقابلے اچ پنجاب اچ وزیراعلیٰ شہباز شریف مثالی کم کیتے اتے ساریاں صوبایں اچ ا یہ تاثر موجود ہے جو پنجاب دی نسبت بئے صوبیاں اچ ترقیاتی عمل دی رفتار گھٹ ہے، ایہ اوہ مثالی ترقیاتی کم ہن جیرھے مسلم لیگ (ن) کیتے ہن ۔ انہاں آکھیا جو سینٹ وفاق دی علامت ہے اتے صدر مملکت دی عدم موجودگی اچ چیئرمین سینٹ بحیثیت صدر کم کریندے، اساں سینٹ دی عزت اتے وقار سانگے متفقہ چیئرمین سینٹ دے انتخاب دی تجویز ڈتی ہائی لیکن اج سینٹ دا چیئرمین خریدکیتے گئے ووٹاں نال اتھاں بیٹھے جیندی عوام اچ کوئی عزت کائنی۔ وزیراعظم عوام کوں آکھیا جو ا وہ جولائی اچ اپنڑے ووٹ دا حق استعمال کرین اتے اتے ایہ فیصلہ کریندے ہوئیں انہاں گالھیں کوں مدنظر رکھین ،جوا یہ فیصلہ آسان ہے مشکل کائنی۔ انہاں آکھیا جو مسلم لیگ (ن) دی کارکردگی پورے ملک اچ ساریاں دے سامنڑے ہے اتے عوام آندے الیکشن اچ صحیح فیصلہ کر تے اپنڑی قیادت دا انتخاب کریسی جیرھی جو ملک دی ترقی اتے خوشحالی سانگے کردار ادا کریسی۔
