اسلام آباد ۔ 23مارچ (اے پی پی) سپیکر قومی اسمبلی سردار ایاز صادق اتے قائم مقام سپیکر قومی اسمبلی مرتضیٰ جاوید عباسی یوم پاکستان دے پروقار موقع تے اپنڑے انج انج پیغاماں اچ قوم کوں مبارخباد ڈیندے ہوئیں آکھے جو 23 مارچ دا ڈینھ برصغیر دی تریخ اچ ہک منفرد مقام رکھیندے۔ سپیکر قومی اسمبلی قوم دے نا ں اپنڑے تہنیتی پیغام اچ آکھے جو 78 سال پہلے اج دے ڈینھ جنوبی ایشیا دے مسلماناں قائداعظم محمد علی جناح دی قیادت اچ اپنڑے کیتے انج وطن گھنڑ سانگے جدوجہد کرنڑ دا عہد کیتا اتے قرارداد لاہور منظور کیتی ،جیکوں بعد اچ قرارداد پاکستان دا ناں ڈتا گیا۔ ایں قرارداد مسلماناں وکں نواں راہ اتے سوچ ڈتی اتے تحریک آزادی کوں نواں جوش اتے ولولہ ڈتا۔ سپیکر قائداعظم دی قیادت کوں خراج تحسین پیش کریندے ہوئیں آکھیا جو قائداعظم دی قیادت اتے مقصد دے حصول دی سچی لگن دا کمال ہا جو قرارداد پاکستان دی منظوری دے صرف ست سال دے عرصہ اچ مسلمان ہک پرامن جدوجہد دے ذریعے ساریاں مشکلاں تے مصائب دے باوجود اپنڑے سانگے علیحدہ وطن گھنڑ اچ کامیاب تھئے۔ سردار ایاز صادق آکھیا جویوم پاکستان تجدید عہد وفا دا ڈینھ ہے جو اج دے ڈینھ اساکوں بحیثیت مجموعی آپس دے اختلاف بھلا تے ملک دی تعمیر تے ترقی سانگے ملی اتحاد اتے قائد دے اتحاد، ایمان اتے تنظیم دے رہنما اصولاں کوں اپناونڑدا عہد کرنڑ پوسی ۔ قائم مقام سپیکر مرتضٰی جاوید عباسی آکھیا جو ایں قرارداد آزادی دی تحریک اچ ہک نویں روح پاتی، مسلماناں کوں ہک مقصد عظیم دے حصول سانگے ہک پلیٹ فارم تے ہک مٹھ کر ڈتا۔ ڈوہائیں قائدین یقین ڈیوایا جو پارلیمان اتے موجودہ حکومت ایں مملکت خداداد دی تہذیب، ثقافتی ورثے اتے اقدار دے تحفظ سانگے پرعزم ہے۔ انہاں آکھیا جو قرارداد پاکستان دی روشنی اچ ہی ملک اچ معاشی تے سماجی انقلاب گھن آونڑ دی بھرپور کوششاں جاری رکھیاں ویسن۔
