اسلام آباد ۔ 27 اپریل (اے پی پی) آندے مالی سال سانگے قومی معیشت دی شرح نمو دا ہدف 6.2فیصد مقررکیتا گے جڈاں جو زراعت دے شعبے دی ترقی 3.8فیصد ،انڈسٹری دے شعبے سانگے 7.6فیصد تے خدمات دے شعبے سانگے شرح نمو دا ہدف 6.5فیصد مقرر کیتا گے ۔وزارت منصوبہ بندی ترقی تے اصلاحات ولوں جاری کیتی گی سالانہ ترقیاتی پروگرام 2018-19دے مطابق اجوکے مالی سال دے دوران قومی معیشت دی شرح ترقی اچ 5.8فیصد دا ودھارا تھیا جیرھا جو گزریل 13سال دے دوران ساریں توں ودھ اضافہ ریکارڈ کیتا گے جڈاں جو معیشت دے مختلف شعبیں اچ کیتی ونجنڑ آلی سرمایہ کاری جی ڈی پی دے 16.4فیصد تئیں پج گی اے قومی بچت دی شرح جی ڈی پی دے 12.1فیصد دے مساوی ریکارڈ کیتی گی اے ۔رپورٹ دے مطابق قومی معیشت دی ترقی دے مطلوبہ اہداف دے حصول سانگے سرکاری شعبے دے ترقیاتی پروگرام (پی ایس ڈی پی) سانگے 2043ارب روپے دا بجٹ رکھیا گے جیں اچ 339ارب روپے دی غیر ملکی امدا د وی شامل اے ۔آندے مالی سال سانگے وفاق دے زیر اہمتام پی ایس ڈی پی 1030ارب روپے جڈاں جو صوبیں دے سالانہ ترقیاتی پروگرام دے تحت 1013ارب روپے رکھیے گن ۔ ایں طرح تعلیم سانگے 135 ارب ، اعلیٰ تعلیم سانگے 57 ارب ، وزیراعظم یوتھ پروگرام سانگے10ارب ، سکیورٹی دی صورتحال دی بہتری اتے عارضی طورتے نقل مکانی کرنڑ آلے لوکاں سانگے 90 ارب روپے اتے گیس دے بنیادی ڈھانچے دی ترقی سانگے 5ارب روپے دا بجٹ رکھیا گے۔اے ڈی پی 2018-19دے مطابق 1998توں گھن تے 2017دے دوران قومی آبادی اچ 2.4فیصد دی شرح نال ودھارریکارڈ کیتا گے ۔ وفاقی حکومت قومی معیشت دی ترقی سانگے سماجی شعبے بالخصوص تعلیم ، صحت ، روزگار دی فراہمی ، ہنر مند افرادی قوت سانگے تربیتی پروگرامز، غربت دے خاتمے سمیت صنفی تضاد دے خاتمے سانگے تے نینگر طبقے دی فلاح بہبوتے خصوصی توجہ ڈیندی پئی اے جیں دے تحت آندے مالی سال دے دوران سماجی شعبے دی ترقی سانگے پی ایس ڈی پی دے تھٹ فنڈز رکیےے گن ۔ رپورٹ دے مطابق قومی ورثہ اورمیڈیا دی ترقی سانگے آندے مالی سال دے دوران 815ملین روپے دے فنڈز رکھیے گن ۔
