کولکتہ ۔ 25 اپریل (اے پی پی)انٹرنیشنل کرکٹ کونسل (آئی سی سی) چیف ایگزیکٹوز کمیٹی آندے سال شیڈول ورلڈ کپ کرکٹ ٹورنامنٹ 1992ءدی طرز تے کراونڑ دی منظوری ڈتی اے،ایونٹ اچ 10 ٹیماں کھیڈسن، چار بہترین ٹیماں سیمی فائنل اچ جاہ بنڑیسن، سیمی فائنلز اتے فائنل کیتے وادھو ڈینہہ رکھیے گن،46 ڈینہہ دے ٹورنامنٹ اچ 11 مختلف جاہیں تے 48 میچ تھیسن۔ آئی سی سی چیف ایگزیکٹوز کمیٹی دی منظوری دے مطابق آندے کرکٹ عالمی کپ اچ 10 ٹیمان آپس اچ میچ کھیڈسن جیندے اچون چار ٹیمان سیمی فائنل اچ ویسی ایں سانگے 46 ڈینہہ تئیں 48 میچ11 مختلف جاہیں لارڈز، اوول، ایجبیسٹن، ٹرینٹ برج، ہینڈنگلے، اولڈ ٹریفورڈ، ٹاﺅنٹن، برسٹول، چیسٹرلی سٹریٹ، ساﺅتھمٹن اتے کارڈف اچ کھیڈیے ویسن۔ اوول 30 مئی کوں انگلینڈ اتے جنوبی افریقہ دے افتتاحی اتے لارڈز 14 جولائی کوں فائنل میچ دا میزبان ہوسی۔ لارڈزپنجوین واری میگا ٹورنامنٹ فائنل دی میزبانی کریسی۔9 جولائی کوں پوائنٹس ٹیبل تے ٹاپ پوزیشن آلی ٹیم اتے چوتھے نمبردکی ٹیم دا پہلا سیمی فائنل اولڈ ٹریفورڈ اچ تھیسی۔ڈو ڈینہہ بعد ڈوجھی اتے تریجھی پوزیشن دیاں ٹیماں دا ڈوجھا سیمی فائنل ایجبیسٹن اچ کھیڈیا ویسی۔دفاعی چیمپئن آسٹریلوی ٹیم 2 جون کوں افغانستان دے خلاف مہم شروع کریسی۔ 16 جون کوں پاکستان اتے روایتی حریف بھارت اولڈ ٹریفورڈاچ آمنڑے سامنڑے ہوسن۔آئی سی سی بورڈ اجلاس اج خمیس آلے ڈینہہ تھیسی جیندے اچ آئی سی سی چیف ایگزیکٹوز کمیٹی دے فیصلیاں دی منظوری دا امکان اے۔
