اسلام آباد ۔ 27 اپریل (اے پی پی) آندے مالی سال 2018-19ءدا 5661 ارب روپے حجم دا وفاقی بجٹ قومی اسمبلی اچ پیش کرڈتا گئے‘جیندے اچ سرکاری ملازماں دیاں تنخواہواں اتے پنشن اچ 10 فیصد ایڈہاک ریلیف الاﺅنس ‘ ہاﺅس رینٹ سیلنگ اتے ہاﺅس رینٹ الاﺅنس اچ 50 فیصدودھارا کیتاگئے‘ دفاعی بجٹ 999 توں ودھا تے 1100 ارب روپے کرڈتا گئے ‘ سرکاری شعبہ دے ترقیاتی پروگرام سانگے 1030 ارب روپے رکھنڑ دی تجویز ہے‘ کل آمدن وچوں صوبائی حکومتاں کوں گزریل سال دے مقابلے اچ 11.8 فیصد ودھ حصہ ڈتا ویسی ‘ 4 لکھ توں 8 لکھ تئیں آمدن تے ہک ہزار روپے جڈانجو 8 لکھ توں 12 لکھ روپے تئیں 2 ہزار روپے دا انکم ٹیکس لاتا ویسی ‘ کھاد ‘ زرعی مشینری ‘ ڈیری تے لائیو سٹاک سانگے ٹیکس اچ گھٹکی کرڈتی گئی ہے۔ جمعہ کوں مفتاح اسماعیل قومی اسمبلی اچ موجودہ حکومت داچھیواں اتے اپنڑاں پہلا بجٹ پیش کیتا۔ وفاقی وزیر خزانہ مفتاح اسماعیل آندے مالی سال 2018-19ءدا بجٹ پیش کریندے ہوئیں آکھیا جو امن و امان دی صورتحال پاروں نقل مکانی کرنڑ آلیان دی بحالی اتے تعمیر نو سانگے 90 ارب روپے رکھے گئے ہن‘ زرعی تحقیق سانگے امدادی فنڈ قائم کرڈتا گئے ‘ برآمدات اچ ودھارے سانگے ٹیکسٹائل ‘ آلات جراعی اتے کھیڈاں دیاں مصنوعات تے سیلز ٹیکس ختم کرڈتا گئے،سڑکاں سانگے 310 ارب روپے تجویز کیتے گن‘ ٹیکسٹائل شعبہ دیاں برآمدات اچ وھارے سانگے مراعات دی پالیسی جاری راہسی‘ ترسیلات زر اچ ودھارے سانگے سٹیٹ بنک انعامی سکیم دا اعلان کریسی‘ کراچی اچ پانڑیں دے بحران دے حل سانگے نجی شعبے دی مدد نال روازنہ پنج کروڑ گیلن پانڑیں فراہم کرنڑ دا پلانٹ لاتا ویسی‘ کراچی‘ پشاور اتے حویلیاں ٹیکسلا ریلوے ٹریک کوں ڈو رویہ بنرایا ویسی ‘ آندے مالی سال دوران بجلی دے شعبہ اچ 138 ارب روپے دی سرمایہ کاری تجویز کیتی گئی ہے‘ دیامر بھاشا ڈیم تے 474 ارب روپے خرچ کیتے ویسن‘ موجودہ مالی سال دت چھیکڑ اچ موٹروے دی لمبائی 2500 کلو میٹر تئیں پج ویسی ‘ گوادر دی ترقی دے منصوبیاں تے 137 ارب روپے خرچ کریسوں‘ صوبائی حکومتاں دے نال رل تے پورے ملک اچ کھیڈاں دے100 سٹیڈیم بنڑائے ویسن‘ پنشن دی گھٹ توں گھٹ حد 6 ہزار توں ودھا تے 10 ہزار کرنڑ‘ 75 سال توں ودھ عمر دے پنشنرز دی پنشن 15 ہزار روپے ماہانہ کرنڑ دی تجویز ہے‘ فاٹا کوں قومی دھارے اچ گھن آونڑ سانگے 100 ارب روپے دی لاگت نال خصوصی ترقیاتی پروگرام مکمل کیتا ویسی ۔ آندے مالی سال سانگے ایف بی آر دے محصولات دی وصولی دا ہدف 4435 ارب روپے ہوسی‘ 1620 ارب روپے قرضے ڈیونڑ سانگے خرچ کیتے ویسن ‘ وفاقی ترقیاتی پروگرام دے تحت 2018-19ءاچ 1030 ارب روپے خرچ کیتے ویسن ۔ بجٹ خسارہ آندے مالی سال دوران جی ڈی پی دا 4.9 فیصد ہوسی۔ بجلی نال چلنڑآلیاں گاڈیاں دی درآمد تے لاتی گئی ڈیوٹی دی شرح 50 فیصد توں گھٹ کر تے25 فیصد اتے 15 فیصد ریگولیٹری ڈیوٹی دی چھوٹ ڈیونڑ دی تجویز ہے‘ ٹیکس ڈیونڑ آلیاں دی سہولت سانگے کمپوزٹ آڈٹ دا طریقہ متعارف کرایا ویسی۔ نان فائلرز 40 لکھ روپے توںودھ مالیت دی جائیداد نی خرید سگدے۔ بینکاری اتے نان بینکاری کمپنیاں سانگے سپر ٹیکس دی شرح سالانہ ہک فیصد دی شرح توں گھٹ کرڈتی ویسی ۔ کارپوریٹ ٹیکس دی شرح کوں 2023ءتئیں 25 فیصد تئیں لاتا ویسی ۔ ایل این جی دی درآمد تے 3 فیصد دی شرح نال ویلیو ایڈیشن ٹیکس کوں ختم کرنڑ دی تجویز ہے۔ گیس دیاں تقسیم کار کمپنیاں دے کیش فلو دے مسائل دے حل سانگے ایل این جی دی درآمد اتے آر ایل این جی دی سپلائی تے موجودہ 17 فیصد دی شرح نال لاتا گیا سیلز ٹیکس گھٹ کر تے 12 فیصد کرنڑ دی تجویز ہے۔ کوئلہ درآمد کرنڑ آلیاں کمپنیاں سانگے ٹیکس دی شرح کوں 6 فیصد توں گھٹ کر تے 4 فیصد کرنڑ دی تجویز ہے۔ قابل ٹیکس آمدنی دی حد اچ 12 لکھ روپے تئیں ودھارے دی وجہ نال گوشوارے جمع کراونڑ آلیاں دی تعداد اچ کافی گھٹکی تھیسی تجویز ہے جو چار لکھ توں 8 لکھ روپے دی آمدن تے 1 ہزار روپے اتے 8 توں 12 لکھ روپے آمدن تے 2 ہزار روپے دا انکم ٹیکس لاونڑ دی تجویز ہے۔ گوشوارے جمع نہ کراونڑ آلیاں ولوں شئیں ویچنڑ تے ودہولڈنگ ٹیکس دی شرح ودھاونڑ دی تجویز ہے جیندے تحت کمپنی دی صورت اچ شئیں ویچنڑ تے موجودہ ست فیصد ودہولڈنگ ٹیکس ودھا تے 8 فیصد کرنڑ اتے نان کارپوریٹ کیساں دی صورت اچ موجودہ 7.75 فیصد ودہولڈنگ ٹیکس ریٹ ودھا تے 9 فیصد کرنڑ دی تجویز ہے۔ قرآن پاک دی طباعت اچ استعمال تھیونڑ آلے کاغذ تے کسٹم ڈیوٹی دے نال سیلز ٹیکس دی چھوٹ ڈتی ویسی۔ ایہ چھوٹ وفاقی اتے صوبائی حکومتاں دے علاوہ قرآن پاک دے رجسٹرڈ ناشران کوں وی میسر ہوسی۔ زرعی شعبے دی ترقی سانگے ہر قسم دی کھاد تے سیلز ٹیکس دی شرح کوں گھٹ کر تے ترائے فیصد کرنڑ دی تجویز ہے۔ ڈیری فارماں سانگے پکھیاں تے زناوراں دی خوراک دی تیاری تے عائد سیلز ٹیکس دی چھوٹ دی وی تجویز ہے ایندے علاوہ زرعی مشینری تے سیلز ٹیکس دی شرح کوں ست فیصد توں گھٹ کر تے پنج فیصد کرڈتا ویسی ۔ مقامی طور تے لیپ ٹاپ اتے کمپیوٹر اچ استعمال تھیونڑ آلے 21 قسم دے پرزاں دی درآمد تے سیلز ٹیکس مکمل ختم کرڈتا ویسی۔ سٹیشنری سانگے سیلز ٹیکس ختم کرڈٹا ویسی۔ سگریٹ تے فیڈرل ایکسائز ڈیوٹی دی موجودہ شرح کوں ودھاونڑ دی تجویز ہے۔ افزائش سانگے ڈانداں دی درآمد تے عائد ترائے فیصد کسٹم ڈیوٹی ختم کرڈتی ویسی زتے زناوراں دی خوراک دی درآمد تے کسٹم ڈیوٹی دی رعایتی شرح کوں 10 فیصدتوںپنج فیصد کرڈتا ویسی۔ خیراتی اداریاں اتے ہسپتالاں کوں مشینری تے آلات دی ڈیوٹی فری درآمد دی اجازت ہے تاں جودرآمد کیتے ونجنڑ آلیاں شئیں ست سال دے اندر انہاں اشیاءکوں ٹھکانڑے لاونڑ نال انہاں شئیں تے عائد پوری ڈیوٹی اتے ٹیکس گھدے ویسن جڈانجو ست سال دے بعد انہاں تے کوئی ڈیوٹی یا ٹیکس کائناں لاتا ویسی ۔ آندے مالی سال سانگے وفاقی حکومت دی کل آمدن دا تخمینہ 5661 ارب روپے ہے جیرھا جوپچھلے سال دے نظرثانی تخمینہ دے مقابلے اچ 13.4 فیصد ودھ ہے۔ کل آمدن وچوں صوبائی حکومتاں دا حصہ 2590 ارب روپے ہوسی جیرھا جو تقریباً 11.8 فیصد ودھ ہے۔ آپٹک فائبر کیبل دی درآمد تے ریگولیٹری ڈیوٹی 20 فیصد توں گھٹ کر تے 10 فیصد کرنڑ دی تجویز ہے۔ مقامی صنعت دی ترقی سانگے پلاسٹک دی درآمد تے کسٹم ڈیوٹی 16 فیصد توں گھٹ کر تے 11 فیصد کرڈتی ویسی۔ آندے مالی سال سانگے دفاعی بجٹ 1100 ارب روپے رکھے ونجنڑ دی تجویز ہے۔ سرکاری شعبہ دے ترقیاتی پروگرام سانگے 1030 ارب روپے رکھے گئے ہن۔ بے نظیر انکم سپورٹ پروگرام سانگے فنڈ ودھا تے 124 ارب 70 کروڑ روپے کرڈتے گن۔ غربت مکاونڑ سانگے فنڈ 68 کروڑ 80 لکھ روپے رکھے ویندے پن۔ بیواﺅں دی قرض حسنہ سانگے سکیم دی رقم ودھا تے 6 لکھ روپے کرڈتی گئی ہے۔
