اسلام آباد ۔ 18 اپریل (اے پی پی) اقوام متحدہ اچ پاکستان دی مستقل سفیر ملیحہ لودھی آکھیے جو مقبوضہ کشمیر اچ تریمتیں دے خلاف جنسی تشدد دے واقعات دے خاتمے دی ضرورت اے ،انہاں ساری دنیا دے متنازعہ خطے اچ جنسی طور تے ہراساں کرنڑ دے واقعات دے خاتمے سانگے مطالبہ کر ڈتا تے آکھیا مقبوضہ کشمیر اچ تریمتیں تے کیتے ونجنڑ آلے جنسی تشدد دے خاتمے سانگے اقوام متحدہ دی سلامتی کونسل اپنڑاں کردار ادا کرے ۔اقوام متحدہ دی سلامتی کونسل اچ جنسی تشدد دے خاتمے دے حوالے نال خطاب کریندے ہوئیں پاکستان دی سفیر ملیحہ لودھی آکھیا جو میانمار توں گھن تے مقبوضہ کشمیر تئیں دنیا دے جھیڑے آلے علاقیں اچ ریاستی تے غیر ریاستی عناصر مخالف آبادی تے دباﺅ ودھاونڑ سانگے تریمتیں تے جنسی تشدد کوں بطور ہتھیار استعمال کریندے پن ۔
