ایف بی آر دیاں ٹیکس وصولیاں اچ گزریل 5سال اچ سالانہ 20فیصد دا ودھارا ،محاصل دگنے تھی گن ،2013اچ صوبیں کوں 13ارب ڈتے ویندے ہن ہنڑ 23سو ارب ڈتے ویندے پن ، کمشنر دے اختیارات وی ہیڈ کوارٹرز کوں منتقل کرڈتے گن ، وزیراعظم شاہد خاقان عباسی 3 سال اچ برآمدات اچ ودھارے دا ہدف ڈتے ، برآمدی پیکج تے عملدرآمد سانگے کمیٹی بنڑائی ویسی وفاقی وزیر خزانہ ڈاکٹر مفتاح اسماعیل اتے ریونیو سانگے وزیر اعظم دے معاون خصوصی ہارون اختر خان دہ پوسٹ بجٹ پریس کانفرنس

اسلام آباد ۔28اپریل (اے پی پی)وفاقی وزیر خزانہ ڈاکٹر مفتاح اسماعیل اتے ریونیو سانگے وزیر اعظم دے معاون خصوصی ہارون اختر خان آکھیا جو ایف بی آر ٹیکس وصولیاں اچ گزریل 5سال دے دوران سالانہ 20فیصد دا ودھارا ،محاصل دوگنے تھی گن ،2013اچ صوبیں کوں 13ارب ڈتے ویندے ہن ہنڑ 23سو ارب ڈتے ویندے پن، کمپنیاں دا ٹیکس آڈٹ ترائے سال اچ صر ف ہک واری آڈٹ کیتا ونج سگسی ۔تنخواہ دار طبقے کوں ٹیکس توں پورا استثنیٰ ڈتے ۔کمشنر دے اختیارات وی ہیڈکوارٹر کوں منتقل کر ڈتے گن ،کارپوریٹ ٹیکس دی شرح مراعات ڈتیاں ہن تاں جو عام شیئر ہولڈر ز کوں منافع اچ شامل کیتا ونج سگے ۔وزیراعظم شاہد خاقان عباسی ترائے سال اچ بر آمدات اچ ودھارے دا ہدف ڈتا ،بر آمدی پیکیج تے عمل در آمد سانگے کمیٹی بنڑائی ویسی ،قومی صنعت دے تحفظ سانگے جامع اقدامات کیتے گن تے خام نال مشینری تے فاضل پر زہ جات دی در آمد تے ٹیکس دی شرح کوں گھٹ یا ختم کر ڈتا گے ،تیار ہوٹلاں ،کمریں دی در آمد ،ڈیری ،زراعت ،فلم انڈسٹری ایل ای ڈی تے کولیں دی در آمد تے ٹیکس گھٹ کیتن ،ایمبولینس کوں ٹیکس توں پورا استثنیٰ ڈتا گے ،انکم ٹیکس وصولیاں کوں ودھاونڑ سانگے وی ودھ سارے اقدامات کیتے گن ۔گاڈیاں تے غیر منقولہ جائیداد دی خریداری سانگے گوشوارے جمع کراونڑ لازمی ۔گوشوارے جمع نہ کراونڑ آلی گاڈی تے غیر منقولہ جائیداد تے ودھ ٹیکس ادا کریسن ۔ہفتے کوں اتھاں پوسٹ بجٹ پریس کانفرنس نال خطاب کریندے ہوئیں وفاقی وزیر خزانہ ڈاکٹر مفتاح اسماعیل آکھیا جو بجٹ دی تیاری اچ محنت کیتی گی تے وزیراعظم سمیت وزارت خزانہ تے ایف بی آر دے حکام دیاں کوششاں قابل قدر ہن ۔انہاں آکھیا توانائی دی قیمت دے حوالے نال موجودہ مسلیں کوں وختی پورا کیتا ویسی ۔ ریونیو سانگے وزیر اعظم دے معاون خصوصی ہارون اختر خان آکھیا جو باہرلے لوکاں کوں احساس کائنی جو بجٹ تیاری اچ کتنی محنت گی اے ،ایں ضمن اچ ایف بی آر دی ٹیم دیاں کاوشاں قابل قدر ہن۔ انہاں آکھیا جو بجٹ دی تیاری سانگے وزیراعظم شاہد خاقان عباسی، وفاقی وزیر خزانہ ڈاکٹر مفتاح اسماعیل سمیت سارے شراکت داراں نال تفصیلی مذاکرات دے بعد قومی ترقی سانگے اہم فیصلے کیتے گن ۔ ہارون اختر خان آکھیا جو ٹیکس دہندگان اتے ٹیکس وصول کرنڑ آلے اداریں وچال جھیڑے دے خاتمے سانگے کمیٹی دا فیصلہ حتمی ہوسی ۔ انہاں آکھیا حکومت سپر ٹیکس دی شرح اچ سالانہ ہک فیصد دی گھٹکی کیتی گی اے تے ایندے نال کارپوریشناں تے عائد سپر ٹیکس ترائے سال جڈاں جو بینکاں تے عائد ٹیکس چار سال اچ مک ویسی ۔ انہاں آکھیا ہک کروڑ روپے توں ودھ ترسیلات زر تے آمدنی دا ذریعہ ڈساونڑاں ہوسی تے ٹیکس وی ڈیونڑاں ہوسی ۔