خاران۔07 اپریل ( اے پی پی ) وفاقی وزیر سیفران جنر ل(ر)عبدالقادر بلوچ آکھیا جو بلوچستان اسمبلی اچ گھن آونڑ آلیاں تبدیلیاں کوں خاران دے عوام یکسر مسترد کرڈتا، اج وی بلوچستان دے عوام مسلم لیگ (ن)دے نال ہن ، ترقیاتی منصوبیاں دی تکمیل نال عوام دے معیار زندگی اچ بہتری امسی اتے جولائی تئیں ماشکیل خاران اتے بئے علاقیاں اچ شمسی توانائی دے ذریعے بجلی دی فراہمی کوںممکن بنڑایاویسی ۔ اے گالہیں انہاں خاران یک مچ شاہراہ دی افتتاحی تقریب دے موقعے تے سپاس نامہ پیش کریندے ہوئیں کیتا۔ ایں موقعے تے وزیراعظم پاکستان شاہد خاقان عباسی وفاقی وزراءمیر حاصل خان بزنجو ،چیف سیکرٹری بلوچستان اورنگزیب حق ،چیئرمین نیشنل ہائی وے اتھارٹی جواد ملک،آئی جی بلوچستان معظم جاہ انصاری ،سمیت بئے قبائلی عمائدین وی شریک تھئے ۔ وفاقی وزیر سیفران آکھیا جو اساں وزیراعظم پاکستان شاہد خاقان عباسی دا خاران آمد تے شکریہ ادا کریندے ہئیں جنہاں پہلی واری خاران آتے اساکوں عزت ڈتی ، انہاں آکھیا جو 2013دے بعد مسلم لیگ (ن)سارے ملک اچ ترقی دا جیہڑا سفر شروع کیتا اج او منصوبے پورے تھی گئے ہن ، خاران یک مچ منصوبے اُتے 14ارب روپے لاگت آمسی ، انشاءاللہ اے منصوبہ ایں سال دے آخر تئیں پورا تھی ویسی ، جیندے نال کراچی اتے اندورن سندھ دا فاصلہ ہمسایہ ملک ایران دا سفر صرف 10گھنٹیاں اچ طے تھیسی ، ایں توں علاوہ بلوچستان دے زمینداراں کوں تیار فصل سندھ دے مختلف شہراں تئیں پجاونڑ اچ مدد ملسی ۔ انہاںآکھیا جو زائرین کوں وی ایں شاہراہ توں فیدہ تھیسی ، وفاقی وزیر آکھیا جو سی پیک منصوبے دے تحت پنجگور خاران اتے ماشکیل اچ 25ارب روپے دی لاگت نال مختلف شاہراواں اُتے کم جاری ہے ۔ انہاں آکھیا جو وفاقی حکومت دے تعاون نال خاران اچ کیڈٹ کالج 1ارب 32کروڑ دی لاگت نال ایں سال پورا تھی ویسی جیندے اچ درس وتدریس دا عمل شروع تھی ویسی ۔ انہاں آکھیا جو وزیراعظم 30کروڑ روپے شمسی کٹ کیتے ڈتے ہن جیندے نال خاران دے ہرگھر اچ بجلی دی فراہمی ممکن تھی ویسی ۔ انہاں وزیراعظم توں مطالبہ کیتا جو بے نظیر انکم سپورٹ پروگرام دی تکھے فراہمی کوں یقینی بنڑایا ونجے تانجو خاران دے عوام ایندے توں فیدہ چاءسگن۔
