باﺅ ۔ 10 اپریل (اے پی پی) وزیراعظم شاہد خاقان عباسی صارفین کوں صاف، سستی اتے پائیدار بنیاداں اُتے توانائی دی فراہمی دے حکومتی عزم دا اظہار کریندے ہوئیں آکھیا جو تیل تے گیس دے شعبے کوں ترجیح حاصل ہے جیکوں پاک۔چین اقتصادی راہداری کیتے لمبی مدت دے منصوبے اچ خاص حیثیت حاصل ہے، چینی سرمایہ کار اتے کمپنیاں پرکشش منافع اتے مراعات دے حامل بجلی دے شعبے اچ ترقی دے عمل اچ شریک تھیون۔ انہاں اے گالھ نیشنل انرجی ایڈمنسٹریشن (این ای اے) آف چائنہ دے ایڈمنسٹریٹر نوئر بیکلے نال گالھ مہاڑ کریندے ہوئیں آکھی، جنہاں باﺅ فورم دے موقعے اُتے منگل کوں اتھاں انہاں نال ملاقات کیتی۔ وزیراعظم پاکستان اچ توانائی دی گھٹکی اُتے قابو پاونڑ اچ سی پیک توانائی منصوبیاں دے کردار دی تعریف کریندے ہوئیں ایں بارے چین دی حکومت اتے این ای اے دا معاونت اُتے شکریہ ادا کیتا۔ انہاں آکھیا جو اے منصوبے مستعد اتے قابل برداشت بجلی فراہم کریندے پئے ہن اتے ڈوہائیں پاسوں پاکستان دے شمال اچ پن بجلی اتے جنوب اچ ضلع تھر اچ مقامی کوئلہ اُتے مبنی بئے منصوبیاں اُتے کم جاری رکھے ہوئے ہن ۔ انہاں کراچی اتے تھر اچ آندے پیداواری منصوبیاں دے نال شمال جنوب ٹرانسمیشن لائن دی تکھے تکمیل اتے ہم آہنگی دی لوڑ دا وی عندیہ ڈتا۔ وزیراعظم آکھیا جو حکومت قابل برداشت اتے متنوع توانائی دی فراہمی اُتے توجہ ڈتی ہوئی ہے کیونجو پاکستان اچ کوئلہ، پانڑیں، شمسی توانائی اتے ہوا نال بجلی دی پیداوار دے وڈے موقعے موجود ہن ۔ وزیراعظم این ای اے اتے حکومت پاکستان وچال بئے مستحکم تعاون دی امید ظاہر کیتی۔ وزیر خارجہ خواجہ محمد آصف، وزیر داخلہ احسن اقبال، پاکستان دے سفیر مسعود خالد اتے سینئر حکام وی ایں موقعے تے موجود ہن ۔
