خاران کیڈٹ کالج ہک ارب 32کروڑ روپے دی لاگت نال تکھے مکمل کرگھدا ویسی ، وفاقی وزیر سیفران

اسلام آباد ۔08اپریل (اے پی پی)وفاقی وزیر برائے ریاستیں و سرحدی علاقہ جات ( سیفران) عبدالقادر بلوچ آکھے جو خاران کیڈٹ کالج ہک ارب 32کروڑ روپے دی لاگت نال بہوں تکھے پورا تھیسی ۔ ماشکیل اتے خاران دے لوکیں کوں شمسی توانائی توں پیدا تھیونڑآلی بجلی فراہم کیتی ویسی ۔ اتوار کوں ذرائع ابلاغ دے نمائندیاں گالھ مہاڑ کریندے ہوئیں وفاقی وزیر آکھیا جو وفاقی حکومت صوبہ بلوچستان اچ توانائی سمیت مختلف ترقیاتی منصوبے شروع کیتے ہن جنہاں اچوں ہک منصوبہ خاران کیڈٹ کالج دا ہے جیندے کیتے وفاقی حکومت ہک ارب 32کروڑ روپے ڈتے ہن ۔ انہاں آکھیا جو توانائی دے منصوبیاں دے تحت بلوچستان اچ توانائی دی گھٹکی کوں پورا کرنڑ سانگے ماشکیل اتے خاران سمیت بئے علاقیاں اچ شمسی توانائی توں پیدا تھیونڑ آلی بجلی فراہم کیتی ویندی پئی ہے ۔