اسلام آباد ۔ 5 اپریل (اے پی پی) وزیر اعظم شاہد خاقان عباسی آکھیے جو دنیا اچ کوئی ایجھا ملک کائنی جیں نے دہشت گردی دے خلاف کہیں جنگ لڑ تے ایجھی بے مثال کامیابی حاصل کیتی ہووے جیویں پاکستان حاصل کیتی، دنیا دہشت گردی دے خلاف اساڈیاں کوششاں دی بے قدری کیتی پر اساڈے عزم کوں کچا نی کر سگی، پاکستان اج ہک محفوظ ملک ہے، ترقی اتے خوشحالی دے منصوبے لگدے پن، سی پیک منصوبیں نال پاکستان مشرق وسطیٰ اتے یورپ نال جڑ ویسی، چیلنج نال نبڑن جانڑدوں ، عوام انتہاپسنداں کوں ہمیشہ مسترد کیتا، قندوز اچ بالاں دی شہادت داواقعہ افسوسناک ہے ،ایجھے واقعات نال انتہا پسندی جنم گھندی اے، عالمی برادری مقبوضہ کشمیر اچ انسانی حقوق دیاں خلاف ورزیاں رکواوے، پاکستان اپنڑے حصے دا کم کرڈتے اتے کریندا پئے ،دنیا وی اپنڑے حصے داکم کرے۔ خمیس کوںبین الاقوامی انسداد دہشت گردی فورم نال خطاب کریندے ہوئیںوزیرا عظم آکھیا جو سوویت یونین داشیرازہ ترٹنڑدے بعد عالمی ترجیحات بدل گن ۔ پاکستان ایں جنگ دی وڈی قیمت ڈتی اے۔پاکستان دہشت گرد حملیں اچ بینظیر بھٹو شہید سمیت ہزاراں جاناں دی قربانی ڈتی۔ چرچ ، مسیتاں ، سکول ، مزاراں سمیت کوئی جاہ دہشت گرداں دے حملیں توں محفوظ کائناں ہائی۔ افغان جنگ دے بعد منشیات عام تھی گئی۔ آرمی پبلک سکول تے حملے اچ بالاں دی شہادت داواقعہ تبدیلی دانقطہ آغاز ثابت تھیا اتے پوری قوم دہشت گرداں دے خلاف رل مل تے لڑنڑ دا فیصلہ کیتے۔ دہشت گردی دے خلاف جنگ اچ اساں سیاسی، جانی تے مالی ضیان چاتا۔ نیشنل ایکشن پلان تے عملدرآمد سانگے نیکٹا دا ادارہ بنڑیا، صورتحال نال نبڑن سانگے سخت اقدامات دی ضرورت ہئی ۔ پاکستان اپنڑے شہراں ، سرحدی تے قبائلی علاقیاں اچ اپریشن کیتے اتے اج فخر نال آکھ سگدوں جو فوج، پولیس اتے قنون نافذ کرنڑ آلے اداریں اتے عوام دیاں قربانیاں دی وجہ نال اساں اے جنگ جھنڑںگھدی ہے ۔ اساں ایہ جنگ اپنڑے وسائل نال لڑی، کہیں بئے ملک دہشت گردی دے خلاف ایجھی جنگ نی لڑی جیویں جو پاکستان لڑی ۔وزیراعظم آکھیا جودنیااچ کہیں وی ملک دہشت گردی مکاونڑ سانگے 2 لکھ فوج تعینات نی کیتی اساں ایں جنگ اچ ودھ ساری اوکھ دا سامنڑاں کیتا۔ دنیا اساڈیاں کوششاںکو ںکمزور کیتا لیکن اساڈے عزم کوںکچا نی کر سگی ۔اج پاکستان ہک محفوظ ملک ہے ،اساڈے شہر دنیا دے خطرناک شہراں اچ شمار تھیندن لیکن کراچی جئے وڈے شہر اچ اج امن ہے اتے معمول دے سٹریٹ کرائمز دے علاوہ اتھاں امن و امان داکوئی مسئلہ کائنی۔ انہاں آکھیا اساں دہشت گرداں دے خلاف ا ے جنگ جاری رکھیسوں۔ حکومت دیاں کوششاں نال معاشی صورتحال چنگی تھی گئی ہے۔ سی پیک جئے منصوبے بنڑدے پن۔ دنیا دے سرمایہ کار اتے کاروباری لوک پاکستان اچ ترقی تے خوشحالی دے منصوبیاں اچ دلچسپی رکھیندن ۔ سی پیک جئے منصوبیاں نال پاکستان وسط ایشیاءاتے یورپ تئیں رسائی حاصل کریسی۔ پاکستان بلند شرح نمو دا ہدف حاصل کیتے۔ ملک اچ سرمایہ کاری آندی پی ہے اتے ہر شعبے اچ سرمایہ کار دلچسپی گھدے پن ۔ انہاں آکھیا جوچیلنجز ہمیشہ موجود راہندن لیکن اساں انہاں نال نبڑن جانڑدوں ۔اساں معیشت کوں ٹریک تے گھن آونڑ اچ کامیا ب تھی گیوں۔ انتہاپسندی نال وی نبڑسوں ۔ااے صرف حکومت دی جنگ نی پورے معاشرے دی جنگ ہے ۔ عوام ہمیشہ پولنگ سٹیشناں تے انتہا پسندی کوں مسترد کیتے۔ عوام انتہا پسندی کوں پسند نی کریندے ،اساڈی حکومت اوکھے فیصلے کیتے۔ انہاں آکھیا جوپاکستان دنیا اچ کلھا ملک ہا جتھاں عام شہریاںکو ںخود کار ہتھیاراں دے لائسنس جاری تھیندے ہن ۔ کابینہ ایں تے پابندی لاتی۔ کہیں وی ملک اچ مختلف مکاتب فکر دے 18سو عالماں دہشت گردی اتے خود کش حملیاں دے خلاف فتویٰ نی ڈتا ۔ انہاں آکھیا جو پاکستان افغانستان اچ امن سانگے کوشاں ہے۔ پاکستان توں ودھ افغانستان اچ امن داخواہشمند کوئی کائنی۔ جنگ مسئلے داحل نی ۔ وزیراعظم قندوز اچ بالاں تے حملے دے واقعہ تے افسوس دا اظہار کریندے ہوئیں آکھیا جوایجھے واقعات انتہا پسندی کوں جنم ڈیندن ۔ انہاں آکھیا جو افغانستان اچ امن جنگ نال نی صرف افغاناں وچال مذاکرات نال آوسی ۔ پاکستان ایں سلسلہ اچ کہیں وی فورم تے اپنڑاں تعاون پیش کرنڑ سانگے تیار ہے۔ انہاں جو اساں اپنڑیاں سرحداں کوں محفوظ بنڑایا اتے واڑ لاتی ۔ پاکستان اچ دہشت گرداں دیاں پناہ گاہواںداالزام دی تردید کریندوں۔ پاکستان اچ دہشت گردی سانگے اکساونڑ آلےاں دیاںپناہ گاہواں افغانستان اچ ہن اتے ا یہ ہک حقیقت ہے جیندا سد باب کرنڑ دی ضرورت ہے۔ انہاں آکھیا جو کشمیر اچ تحریک آزادی جاری ہے اساں اقوام متحدہ دی سلامتی کونسل دیاں قراردادں دے مطابق مسئلہ کشمیر داحل چاہندوں۔ انہاں عالمی برادری تے زور ڈتا جو انسانی حقوق دیاں خلاف ورزیاں بند کراونڑ ۔ وزیر اعظم اتوار کوں مقبوضہ کشمیر اچ17 کشمیری نوجواناں دی بہیمانہ شہادت دی مذمت کریندے ہوئیں آکھیا جو ایندے توں انتہا پسندی جنم گھندی ہے۔ انہاں آکھیا جو اساں انہاں وجوہات کوں مکاونڑ پوسی جنہاں دے نال دہشت گردی اتے انتہا پسندی جمدی ہے۔ انہاں انسداد دہشت گردی دے حوالے نال بین الاقوامی فورم دے انعقاد کوں خوش آئند قرار ڈیندے ہوئیں آکھیا جوپاکستان دہشت گردی دے خلاف جنگ اچ اپنڑے حصے دا کم کرچھوڑے اتے کریندا پئے ،دنیاکو ں وی اپنڑے حصے داکم کرنڑاںچاہیدے۔
