اسلام آباد ۔ 27 اپریل (اے پی پی) آندے مالی سال 2018-19ءدے سرکاری شعبہ دے ترقیاتی پروگرام (پی ایس ڈی پی)دے تحت سرائیکی وسیب دا وی حصہ رکھیا گئے ایں سانگے جنوبی پنجاب دے علاقیاں کوں لاہور توں کراچی اتے کوئٹہ بذریعہ خانیوال اتے ملتان چنگیاں سڑکاں دی تعمیرنال انہاں علاقیاں وچال ناصرف پندھ گھٹسی بھل سفر اچ وی سوکھ ملسی۔ایویں ہی خیبر پختونخوااچ سرائیکی علاقیاں خاص کر ڈیرہ اسماعیل خان دے لوکاں کوں ڈیرہ اسماعیل خان تئیں موٹر وے جڈاں جو 210کلومیٹر یارک ، ساگو ، ژوب بشمول ژوب بائی پاس کیتے چنگاں سفر نصیب تھیسی۔جمعہ کوں قومی اسمبلی دے اجلاس اچ وزیر خزانہ مفتاح اسماعیل بجٹ پیش کریندے آکھیے جو حکومت پنج سالاں اچ ترقیاتی بجٹ اچ بہوں وادھا کیتے اتے ایں دوران230 فیصد دے ریکارڈ ودھارے نال ترائے ہزار ارب روپے خرچ کیتن۔انہاں دا آکھنڑ ہا جو آندے مالی سال 2018-19ءدے سرکاری شعبہ دے ترقیاتی پروگرام اچ نیشنل ہائی وے اتھارٹی دے 230کلو میٹرلاہورملتان موٹر وے این فائیو دے جاری منصوبے کوں ودھاونڑاتے چنگائی کیتے 5 ارب 39 کروڑ 70لکھ روپے خرچ کیتے ویسن۔ایندے اچ 56کلومیٹر خانیوال ملتان موٹر وے سیکشن وی شامل اے،شور کوٹ توں خانیوال موٹر وے وی پلان دا حصہ اے۔ایندے نال نال این ایچ اے دے 184کلومیٹر ایکسپریس وے خانیوال ای فور منصوبہ کےتے 10 ارب روپے مختص کیتے گن۔ایں منصوبہ اچ 8 ارب 50 کروڑ روپے نال غیر ملکی سرمایہ کاری کیتی ویسی۔حکومت ایندے تے ہک ارب 50 کروڑ روپے مقامی طورتے خرچ کریسی۔ڈوجھے پاسو نیشنل ہائی وے اتھارٹی دے جاری منصوبے دے تحت 2010ءاچ بارشاں اتے آفتاں پاروں ترٹ بھج وات آونڑ آلیاں سڑکاں دی تعمیر دی بھالی اتے مرمت سانگے نظر ثانی شدہ منصوبیاں کیتے 4 ارب 50 کروڑ روپے رکھیے گن، ایندے اچ رمک توں پشاور سیکشن اتے ڈیرہ غازیخان اچ وی سڑکان دی تعمیر اتے بحالی شامل اے۔اڈو پی ایس ڈی پی اچ نیشنل ہائی وے اتھارٹی دے برہان توں حکلہ، ڈیرہ اسماعیل خان تئیں موٹر وے دے جاری منصوبہ کیتے 25 ارب روپے جڈاں جو این منصوبے سانگے زمین گھنڑ اتے متاثرین دی جائداد دے ازالے کیتے 2 ارب 50 کروڑ روپے رکھیے گن۔ایویں ہی ڈیرہ اسماعیل دے علاقیاں یارک ، ساگو ، ژوب بشمول ژوب بائی پاس 210کلومیٹر دے شاہراتی منصوبے کیتے 7ارب روپے مختص کیتے گن۔منصوبے تے 5ارب 50 کروڑ روپے غیر ملکی اتے ہک ارب 50کروڑ روپے حکومت پاکستان خرچ کریسی۔مفتاح اسماعیل دا آکھنڑ ہا جو سی پیک منصوبیاں دے تحت توانائی منصوبیاں تے کم جاری اے ایں سانگے بارہاں سو میگا واٹ دے حویلی بہادر شاہ آر ایل این جی پلانٹ،کولے نال چلنڑ آلا ساہیوال سپر کریٹیکل پلانٹ اتے چھی سو اسی میگا واٹ دے چشمہ جوہری توانائی پلانٹس تھری اتے فور پہلے ہی فعال تھی چکین۔
