اسلام آباد ۔ 5 اپریل (اے پی پی) پاکستان مقبوضہ کشمیر اچ بھارتی بربریت دی سخت مذمت کریندے ہوئیں آکھیے جو بھارتی دہشت گردی اتے عدم برداشت نال علاقائی امن و سلامتی کوں خطرہ اے، کشمیر دا مسئلہ ہر فورم تے چیسوں،اقوام متحدہ اتے انسانی حقوق دی علمبردار ملک مقبوضہ کشمیر اچ بھارتی مظالم تے کردار ادا کرن،بھارت چاہوے تاں مذاکرات کوں تیار ہیں، دفتر خارجہ اچ ہفتہ وار بریفنگ ڈیندے ہوئیں ترجمان ڈاکٹر محمد فیصل مقبوضہ کشمیر دے علاقیاں شوپیاں،اسلام آباد اتے کنگن اچ معصوم کشمیریاں تے بھارتی سیکیورٹی فورسز وکلوں طاقت دے اندھے استعمال اتے فائرنگے پارون شہادتاں دی مذمت کیتی۔انہاں آکھیا جو وزیر اعظم کابینہ اجلاس اچ مسئلہ کشمیر کوں اگونہا کرنڑ کیتے وفد دنیا دے مختلف ملکاں اچ بھیجنڑ دا فیصلہ کیتے، پاکستان اے مسئلہ ہر فورم تے چیسی۔انہاں آکھیے جو بھارتی ظلم کشمیریاں دے حوصلے نئیں ڈھوا سگدے، پاکستان کشمیری عوام دی سیاسی،اخلاقی اتے سفارتی حمایت جاری رکھیسی، وزیر خارجہ خواجہ آصف آپ دفتر خارجہ اچ غیر ملکی سفیراں اتے ہائی کمشنرز کوں کشمیر اچ بھارتی مظالم اتے انسانی حقوق دیاں خلاف ورزیاں دے حوالے نال بریف کیتے۔انہاں آکھیے جو اساں ایران، ترکی اتے او آئی سی وی کشمیریاں نال اظہار یکجہتی کیتے اتے اساں اقوام متحدہ دے سیکرٹری جنرل نال وی اے معاملہ چاتے۔قومی سلامتی دے مشیر نال بھارتی ہائی کمشنر دی ملاقات بارے ترجمان آکھیا جو پاکستان کڈاھیں گالھ مہاڑ توں انکار نئیں کیتا،اساں جامع مذاکرات کیتے تیار ہیں بھل بھارت آپ مذاکرات توں کڈھویندا پئے۔انہاں آکھیے جو امریکی معاون سیکرٹری ایلس ویلز دے دورے اچ وی امریکا نال کشمیر دے معاملے تے گالھ کیتی اے۔انہاں آکھیے جو وزیراعظم اج جمعہ کوں کابل ویسن اتے 8 اپریل کو ن چین دا وی دورہ کریسن۔ترجمان افغانستان دے صوبے قندوز اچ بیگناہ بالاں اتے شہریاں دی شہادت دی مذمت کیتی اے۔
