مظفر آباد۔ 13 اپریل (اے پی پی) وزیراعظم شاہد خاقان عباسی آکھیا جو کم کرنڑ آلے بندے کوں عدالتاں سیاست توں کڈھ ڈیندن،اے ملک دی بدقسمتی اے جو کم کرنڑ آلیاں کوں عدالت اچ گھیلیا ویندے،جئیں ملک اچ سیاسی قائدین دی عزت کائنا ہوسی اتھاں ترقی مشکل اے،عام آندے انتخابات اچ جیڑھا وی فیصلہ کرن قبول اے،ملک 65سال اچ اتنی ترقی کائنی کیتی جتنی گزیل پنج سالیں اچ تھئی اے،اساں صرف گالھیں نی کم کر تے ڈکھائے،اساڈی حکومت مسئلے حل کرنڑ جانڑدی اے اتے کر تے ڈکھائن،اگر ماضی دی حکومتاں وی آپنڑاں کم کریندی تاں اتنے مسئلے نہ تھیندے،کہیں حکومت ڈو ہزار میگاواٹ بجلی پیدا کائنی کیتی،اساں 10ہزار400میگاواٹ بجلی بنڑا تے ڈکھائی اے۔انہاں اے گالھ جمعہ کوں اتھاں نیلم جہلم منصوبہ دے پہلے یونٹ دی تقریب توں خطاب کریندیں ہوئیں آکھی۔انہاں آکھیا جو نیلم جہلم ہائیڈرو پراجیکٹ پاک چین دوستی دا شاہکار منصوبہ اے،انہاں آکھیا جو ایں منصوبہ دی تعمیر اچ بہوں چیلنجز دا سامنڑاں کرنڑاں پئے۔انہاں آکھیا جو اج ایں موقع تے میں صدر اتے وزیر اعظم آزاد کشمیر دی موجودگی اچ کشمیری عوام دی جدوجہد اتے ایں منصوبے سانگے انہاں دی قربانیاں کوں وی خراج تحسین پیش کریندوں۔انہاں آکھیا جو اساں 70سال توں کشمیر دا مقدمہ لڑدے پئیوں اتے لڑدے رہسوں۔
