لندن ۔ 20 اپریل (اے پی پی) وزیراعظم شاہد خاقان عباسی ’ برطانوی وزیراعظم تھریسامے نال جمعہ کوں اتھاں ونڈسر کیسل اچ ملاقات کیتی۔ملاقات اچ آپسی دلچسپی دے معاملیاں تے گالھ مہاڑ کیتی گئی۔اے ملاقات دولت مشترکہ سربراہان حکومت دے 25ویںاجلاس دے موقع تے تھئی۔ وزیراعظم شاہد خاقان عباسی ’برطانوی وزیراعظم کوں دولت مشترکہ دے سربراہان حکومت دے اجلاس دے کامیاب انعقادتے مبارکباد ڈتی۔انہاں کشمیری عوام دی تحریک کوں اجاگر کریندیں ہوئیں بین الاقوامی برادری تے زور ڈتا جو بھارتی مقبوضہ کشمیر اچ انسانی حقوق دی خلاف ورزیں دی اجوکی صورتحال دا نوٹس گھدا ونجے۔انہاں برطانوی وزیراعظم کوں دہشت گردی تے انتہا پسندی دے خلاف جنگ اچ پاکستان دی کوششاں بارے ڈسایا۔انہاں ڈو پاسہ خصوصی طور تجارت تے سرمایہ کاری دے شعبیاں اچ تعلقات کوں بئیا مضبوط بنڑاونڑ دی اہمیت تے زور ڈتا اتے برطانیہ دے ترقیاتی ادارہ ولوں پاکستان اچ کم کرنڑ تے شکریہ ادا کیتا۔ برطانوی وزیراعظم تھریسامے ’ دہشت گردی دے خلاف پاکستان دی کوششاں کوں سراہیا اتے گزریل ڈاہ سالیں اچ دہشت گردی دے خلاف جنگ اچ ہک لکھ پاکستانیاں کوں متاثر تھیونڑ دا ذکر کیتا۔انہاں وزیراعظم شاہد خاقان عباسی ولوں انہاں دے اجوکے دورہ کابل اچ افغانستان اچ امن بارے کیتی گئی کوششاں کوں سراہیا۔انہاں آکھیا جو پاکستان اتے برطانیہ اچ مضبوط تعلقات ہن جڈانجو ڈوہیں ملکاں اچ تجارت کوں ودھاونڑ دی لوڑھ اے۔
