پاکستان مسئلہ کشمیردے حل سانگے ہر سطح تے کوششاں جاری رکھیسی، حکومت مقبوضہ کشمیر دی صورتحال اتے اتھاں جاری انسانی حقوق دیاں خلاف ورزیاں کوں پوری دنیاکوں ڈساونڑ سانگے 6 اہم ملکاں دے دارالحکومتاں اچ اپنڑے نمائندے پٹھیسوں
مظفرآباد ۔ 4 اپریل (اے پی پی) وزیراعظم شاہد خاقان عباسی آکھے جو پاکستان دی حکومت اتے عوام مقبوضہ کشمیر دے عوام دی سیاسی، سفارتی اتے اخلاقی حمایت جاری رکھیسوں، پاکستان مسئلہ کشمیر دے حل سانگے ہر سطح تے کوششاں جاری رکھیسی ۔ بدھ کوں کل جماعتی حریت کانفرنس دے نمائنداں نال ملاقات دے دوران گالھ بات کریندے ہوئیں وزیراعظم شاہد خاقان عباسی آکھیا جوا وہ خود اتے انہاں دی کابینہ دے ارکان کشمیری عوام نال یکجہتی دے اظہارسانگے آزادکشمیر آئے ہن۔ انہاں آکھیا جو وفاقی کابینہ دے خصوصی اجلاس اچ مقبوضہ کشمیر دے عوام تے بھارتی فوج دے ظلم اتے بربریت تے شدید ڈکھ اتے غصے دا اظہار کیتا گئے ۔ وزیراعظم حریت نمائنداں کوں ڈسایا جو کابینہ دے خصوصی اجلاس اچ بھارتی فوج دے ظلم اتے جبر دی شدید مذمت کیتی گئی۔ وزیراعظم آکھیا جو وزارت خارجہ اتے سارے سفارتی مشنز اقوام متحدہ دی سلامتی کونسل دیاں قرارداداں تے عملدرآمد کراونڑ سانگے متحرک ہن۔ شاہد خاقان عباسی حریت کانفرنس دے رہنماواں اتے نمائنداں دی مسئلہ کشمیر داحل کڈھنڑ سانگے کوششاں اتے قربانیاں کوں خراج تحسین پیش کیتا۔وزیراعظم آکھیا جوجیرھے انداز اچ مقبوضہ کشمیر دے عوام بھارتی جارحیت دا سامنڑاںکریندے پن ا وہ قابل قدر ہے۔ وزیراعظم شاہد خاقان عباسی شرکاءکوں ڈسایا جو پاکستان دی حکومت 6 اہم ملکاں دے دارالحکومتاں اچ اپنڑے نمائندے بھیجسی،تاں جو مقبوضہ کشمیر دی صورتحال اتے اتھاں جاری انسانی حقوق دیاں خلاف ورزیاں کوں پوری دنیا کوں ڈسایا ونج جا سگے ۔حریت رہنماواں وزیراعظم شاہد خاقان عباسی کوں مقبوضہ کشمیر اچ حالیہ صورتحال بارے آگاہ کیتا۔ حریت نمائنداں مقبوضہ کشمیر اچ انسانی حقوق دیاں خلاف ورزیاں خصوصاً پیلٹ گنز دے استعمال تے تشویش دا اظہار کیتا۔ آل پارٹیز حریت کانفرنس دے نمائنداں پاکستان دی حکومت اتے وزیراعظم دا شکریہ ادا کریندے ہوئیںآکھیا جو مقبوضہ کشمیر اچ بھارتی جارحیت دے واقعات دا فوری نوٹس گھدا گئے اتے کابینہ دا خصوصی اجلاس بلایا گئے۔ حریت نمائنداں وزیراعظم شاہد خاقان عباسی اتے کابینہ ارکاناں دے آزادکشمیر دادورہ کرنڑ تے انہاں دا شکریہ ادا کیتا۔وزیراعظم نال حریت نمائنداں دی ملاقات اچ آزادکشمیر دے وزیراعظم راجہ فاروق حیدر،صدر آزادکشمیر سردار مسعود خان، پارلیمنٹ دی کشمیر کمیٹی دے سربراہ مولانا فضل الرحمان، وزیرخارجہ خواجہ محمد آصف، وزیر امور کشمیر چوہدری برجیس طاہر، وفاقی وزراءمشاہد اللہ، رانا تنویر حسین اتے ممتاز احمد تارڑ موجود ہن۔ ملاقات دے دوران حریت رہنما غلام محمد صفی، فیض نقشبندی، محمود ساگر،اشتیاق حمید، محترمہ شمیم شال اتے اعجاز لون وی موجود ہن۔ وزیر اعظم شاہد خاقان عباسی دے مظفر آباد پجنڑ تے صدر آزاد کشمیر سردار مسعود خان، وزیراعظم آزاد کشمیر راجہ فاروق حیدر، سپیکر آزاد کشمیر قنون سازاسمبلی اتے بئے سینئر حکام انہاں دا خیر مقدم کیتا۔
