اسلام آباد ۔ 12 اپریل (اے پی پی) اقتصادی رابطہ کمیٹی سوئی سدرن گیس کمپنی لمیٹڈ (ایس ایس جی سی ایل) کوں 14.8 ارب روپے دی رقم آر ایل این جیII- پائپ لائن منصوبے توں ایل پی جی ایئر مکس منصوبہ جات سانگے ازسرنو مختص کرنڑ دی تجویز منظور کر گھدی جڈاں جو کمپنی کوں ملک دے ہر ضلعے اچ ائیر مکس پلانٹس دے قیام کوں وسعت ڈیونڑ دی ہدایت کیتی ۔ اقتصادی رابطہ کمیٹی دا اجلاس وزیراعظم شاہد خاقان عباسی دی صدارت اچ خمیس کوں وزیراعظم آفس اچ تھیا ۔ ای سی سی 14.8 ارب روپے دی رقم آر ایل این جیII- پائپ لائن منصوبہ توں ایل پی جی ایئر مکس منصوبہ جات سانگے ازسرنو مختص کرنڑ سانگے سوئی سدرن گیس کمپنی لمیٹڈ کوں اجازت ڈیونڑ دی تجویز منظور کر گھدی تاں جو انہاں منصوبیں کوں تکھے پورا کیتا ونج سگے ،صنعتی تے بئے صارفین کوں بلا تعطل گیس دی فراہمی کوں یقینی بنڑایا نج سگے۔ ای سی سی سوئی سدرن گیس کمپنی لمیٹڈ کوں ہدایت کیتی جو ملک دے ہر ضلعے اچ ائیر مکس پلانٹس دی قیا م کوں وسعت ڈتی انجے ۔ای سی سی کاندرہ ڈویلپمنٹ اینڈ پروڈکشن لیز اچ چار سالہ توسیع ڈیونڑ دی تجویز منظور کر گھدی ۔اے فیصلہ مختلف رکاوٹاں کوں سامنڑے رکھ تے کیتا گیا جیرھا جو کاندرہ گیس فیلڈتوں بازیاب کیتے ونجنڑ آلے ذخیرے دی پیداوار تے میسرز پاکستان ایکسپلوریشن پرائیویٹ لمیٹڈ دے ذیلی ادارہ میسرز کاندرہ پاور کمپنی لمیٹڈ ولوں 120 میگاواٹ پاور پلانٹ دے قیام دی راہ اچ حائل ہن۔ وزارت صنعت و پیداوار ولوں پاکستان مشین ٹول فیکٹری کو ں ایندے ریٹائرڈ ملازماں کوں ادا کیتے ونجنڑ آلے واجبات دی ادائیگی سانگے یک وقتی گرانٹ دی منظوری دی درخواست تے غور کیتا ۔ای سی سی پہلی قسط دے طور تے 30کروڑ روپے دی گرانٹ دی منظوری ڈے ڈتی ۔
