وزیر خارجہ خواجہ محمد آصف دا یوم یکجہتی کشمیر دے موقعے تے پیغام

اسلام آباد ۔ 6 اپریل (اے پی پی) وزیر خارجہ خواجہ محمد آصف آکھے جو جموں و کشمیر پاکستان اتے بھارت وچال بنیادی تنازعہ ہے، جموں و کشمیر دے لوکیں دیاں امنگاں دے مطابق ایندے حل تئیں خطے اچ امن داخواب ادھورا راہسی ، عالمی برادری اقوام متحدہ دی سلامتی کونسل دیاں قرارداداں دے مطابق کشمیری عوام نال کیتا گیا وعدہ پورا کرے ۔ انہاں اے گالھ جمعے کوں منائے ونجڑآلے یوم یکجہتی کشمیر دے موقعے تے آپ دے پیغام اچ آکھی ۔وزیر خارجہ آکھیا جو مقبوضہ جموں و کشمیر دے غیور عوام گزریل 70 سالیں توں اقوام متحدہ دی سلامتی کونسل دیاں قرارداداں اچ ڈتے گئے آپنڑیں ناقابل تنسیخ حق خود ارادیت کیتے بھارتی جبر و استبداد دے خلاف بے مثال جدوجہد کر یندے پئے ہن ۔ انہاں قرارداداں اُتے حالی تئیں عمل کائنی تھیا کیونجو بھارت آپنڑیں وعدیاں توں مکر گئے اتے کشمیری عوام اُتے تسلط اتے جبر جاری رکھنڑاں چاہندے ۔ انہاں آکھیا جو ایں ڈینھ پاکستان دی حکومت اتے عوام تے ساری دنیا دے لوک کشمیری عوام کوں بھارتی تسلط دے خلاف منصفانہ جدوجہد اچ انہاں دی بہادری اتے ثابت قدمی اُتے سلام پیش کریندے ہن اتے انہاں دی اخلاقی، سیاسی اتے سفارتی حمایت جاری رکھنڑ دے عزم دا اعادہ کریندے ہئیں ۔ وزیر خارجہ آکھیا جو پاکستان عالمی برادری کوں ایندیاں ذمہ داریاں دی یاد دہانی کرویندے ہوئیں اقوام متحدہ دی سلامتی کونسل دیاں قرارداداں اُتے عملدرآمد نال جموں و کشمیر دے عوام دے ہن کیتے گئے وعدے پورے کرنڑ دا مطالبہ کریندے ۔