اسلام آباد ۔ 26 اپریل (اے پی پی) کابینہ دی اقتصادی رابطہ کمیٹی (ای سی سی) یوٹیلٹی سٹورز کارپوریشن تے کھاونڑ پیونڑ دیاں 19شئیں تے ہک ارب تیہتر کروڑروپے دے رمضان پیکیج دی منظوری دتی اے۔ وزیراعظم شاہد خاقان عباسی دی اگوانڑی اچ ای سی سی دے اجلاس اچ رمضان ریلیف پیکیج دے تحت جنہاں شئیں تے سبسڈی ڈتی ویسی انہاں اچ اٹا،کھنڈ،تیل اتے گھیو، دالاں، بیسن،پنڈ، چاول، سکواشز، کھیر اتے چاہ شامل ہین۔ وزیراعظم ہدایت کیتی جو رمضان پیکیج دے تحت کھاونڑ پیونڑ دیاں شئیں بازار توں گھٹ مل تے ملنڑیان چاہیدن۔ ای سی سی 660 کلو واٹ ایچ وی ڈی سی مٹیاری ۔ لاہور ٹرانسمیشن لائن دی فنانشل کلوزنگ تاریخ اچ پرفارمنس گارنٹی دے پیسے ڈو گنا کیتے بغیر ست مہینے یعنی یکم دسمبر 2018ءتئیں توسیع دی وی منظوری ڈتی۔اے فیصلہ تھر تے کراچی دے نیڑے کولے توں چلنڑ آلے بجلی دے آندے منصوبیاں اتے کراچی اچ 1100 میگاواٹ دے ٹو پراجیکٹ دی الائنمنٹ کیتے کیتا گئے۔ ای سی سی پاور ہولڈنگ پرائیویٹ لمیٹڈ دے ذریعے نویں مالیاتی سہولت دے طورتے کمرشل بینکاں دے ذریعے 100 ارب روپے جمع کرنڑ کیتے پاور ڈویژن دی تجویز منظورکیتی۔ قرضہ دی رقم سینٹرل پاور پرچیزنگ ایجنسی اتے شعبہ جاتی اداریاں دے حوالے نال پاور ڈسٹری بیوشن کمپنیاں دے واجبات دی ادائیگی کیتے استعمال کیتی ویسی۔ مالی سال 2017-18ءکیتے ٹوبیکو دے سیس ریٹس تے نظرثانی دی وی منظوری ڈتی گئی۔ قومی اقتصادی کمیٹی پاسکو کوں سمندری رستے توں 155 ڈالر فی ٹن دے ری بیٹ تے 5 لکھ ٹن وادھو کنڑک برآمد کرنڑ دی وی منظوری ڈتی اے۔
