اسلام آباد ۔ 4 مئی (اے پی پی) وفاقی وزیر ریاض پیرزادہ آکھے جو ایوان اچ ارکاناں دی گھٹ تعداد اچ حاضری تے اپوزیشن لیڈر دے موقف دی مکمل تائید کرینداں، سیاسی ورکراں دی پذیرائی کائنی ، انہاں کوں ہک بئے دے بکھے پوونڑ دے علاوہ بیا کوئی کم نی رہ گیا، لوک اساڈا گریبان وی پکڑیندن۔ جمعہ کوں قومی اسمبلی اچ قائد حزب اختلاف سید خورشید احمد شاہ دے نقطہ ءاعتراض دے جواب اچ انہاں آکھیا جو اساں جمہوریت سانگے جدوجہد کیتی ہے، وقت دے نال نال بہوں کجھ بدل گئے، سیاسی ورکراں دی پذیرائی کائنی ہے، ورکراں کنوںہک بئے دے بکھے پوونڑ دے علاوہ کوئی کم نی رہ گیا۔انہاں آکھیا جو لوک اساڈا گریبان وی پکڑدن ، سیاسی قیادت کوں ایہ گالھ مدنظر رکھنڑ چاہیدی ہے۔ انہاں آکھیا جو ایں ایوان اچ وی اوہا عکاسی ہے، جیویں جویونین کونسل دے اجلاس اچ لڑائیاں تھیندیاں ہن۔ایہ اتھاں وی تھیندا پئے ،ایںحوالے نال قائد حزب اختلاف دی گالھ بات درست ہے۔
