اسلام آباد ۔ 28 مئی (اے پی پی) حکومت اتے اپوزیشن وچال آئندہ نگران وزیراعظم دے حوالے نال اتفاق رائے تھی گے جیں دے مطابق جسٹس (ر) ناصر الملک آئندہ نگران وزیراعظم ہوسن۔ سنوار کوں پارلیمنٹ ہاﺅس اچ وزیراعظم شاہد خاقان عباسی سپیکر قومی اسمبلی سردار ایاز صادق اتے قائد حزب اختلاف سید خورشید احمد شاہ دے نال پریس کانفرنس نال خطاب کریندے ہوئیں آکھیا جو پاکستان دی جمہوری تاریخ دا اہم ڈینھ اے کیوں جو آئندہ عبوری وزیراعظم دے ناں تے اتفاق تھی گے۔ ایں معاملے تے قائد حزب اختلاف دے نال کئی ملاقاتاں تھیاں تے تقریباً چھی ہفتے تئیں حکومت تے اپوزیشن وچال مشورے تھیندے رہیے ۔ایں طرح اساں اپنڑی جماعت نال مشورہ کیتا تے لیڈر آف اپوزیشن وی اپنڑی جماعت نال انہاں ملاقاتاں دے حوالے نال مشاورت کیتی ۔انہاں آکھیا بطور نگران وزیراعظم جیں دے ناں کوں چھیکڑی شکل ڈتی گی اے انہاں دا کردار بہوں شفاف اے ۔کئی وی انہاں دے کردار تے انگلی نی چا سگدا ۔وزیراعظم آکھیا جومیں سپیکر سردار ایاز صادق داوی شکر گزار ہاں جنہاں ایں سارے معاملے اچ اپنڑاں آئینی کردار ادا کیتے ۔ایندے توں پہلے سپیکر قومی اسمبلی سردار ایاز صادق آکھیا جو نگران وزیراعظم دی تعیناتی دا معاملہ صلاح مشورے نال حل تھی گے۔ اے تاریخی فیصلہ اے جو جمہوریت دی فتح اے۔ اے پاکستان اتے جمہوریت ڈوہیں دے حق اچ اے ۔ انہاں آکھیا جو آندے وقت اچ اے گال ثابت تھی ویسی جو اے فیصلہ جمہوریت تے پاکستان دے حق اچ ہے تے ایں تسلسل دے حق اچ اے جیں سانگے اساں جدوجہد کریندے پیوں ۔ قائد حزب اختلاف سید خورشید احمد شاہ آکھیا جو وزیراعظم اتے سپیکر دا شکر گزار ہاں کیوں جو نگران وزیراعظم دے حوالے نال فیصلہ بہوں اہم ہئی ۔ انہاں آکھیا ایں معاملے تے گالھیں تھیندیاں رہ گن جو سیاستدان اپنڑے فیصلے خود نی کر سگدے ہمیشہ فیصلے باہر تھیندن ۔ایں حوالے نال اساڈی وزیراعظم شاہد خاقان عباسی دے نال کئی ملاقاتاں تھیاں ہن ،جیرھے حضرات دے ناں سامنڑے آئے ہن سارے قابل عزت تے قابل احترام ہن اساڈی کوشش اے جو ایجھا فیصلہ تھیوے جیرھا پاکستان تے عوام تے ساریاں سیاسی جماعتاں کوں قبول ہووے اے نظر نہ آوے جو کوئی پارٹی اپنڑاں فیصلہ زور یں مسیں مسلط کریندی پئی اے ۔ایں حوالے نال جیرھی گائیڈ لائن پارٹی ڈتی ایندے مطابق اساں حکومت دے نال گال کیتی ۔انہاں آکھیا جو پیپلز پارٹی تے بیاں اپوزیشن جماعتاں نال وی رابطے تے مشورہ کیتے ۔وزیراعظم شاہد خاقان عباسی تے سپیکر ایاز صادق دا شکر گزار ہاں جو اساں جذبات توں ہٹ تے صبر نال اے فیصلہ کیتے ۔انہاں ڈسایا جو حکومت اتے اپوزیشن وچال آئندہ نگران وزیراعظم سانگے جسٹس (ر) ناصر الملک دے ناں تے اتفاق تھی گے ۔ جسٹس (ر) ناصر الملک چیف جسٹس آف پاکستان وی رہیے ہن ۔ عدالتی تاریخ اچ انہاں دا ہک تاریخی کردار اے ۔ اﷲ تعالیٰ توں دعا ہے جو اﷲ تعالیٰ انہاں کوں جذبہ تے ہمت ڈیوے جو 25 جولائی کو ںصاف، شفاف اتے منصفانہ انتخابات کرا سگن تے آندے عام انتخابات ملکی تاریخ اچ بہوں اہمیت رکھیندن ۔
