اسلام آباد ۔ 28 مئی (اے پی پی) ڈپٹی چیئرمین پلاننگ کمیشن سرتاج عزیز آکھیے جو حکومت سائنس اینڈ ٹیکنالوجی اتے ماحولیات دے شعبیں دی ترقی سانگے ودھ سارے اقدامات کریندی پئی اے ، وژن 2025 دے تحت پلاننگ کمیشن انہاں شعبیں سانگے ہک مربوط منصوبہ بندی کیتی اے جیں دے چنگے نتیجے بر آمد تھیسن ۔ان خیاں دا اظہار انہاں گزریل ڈینھ سنٹرل ڈویلپمنٹ ورکنگ پارٹی دے اجلاس نال خطاب دے دوران کیتا ۔ اجلاس اچ سائنس اینڈ ٹیکنالوجی دے 6 منصوبے پیش کیتے گن جیں اچ پہلا منصوبہ کوئٹہ اچ نسٹ کیمپس دی تعمیر سانگے 2 ارب 62کروڑ 28لکھ 66 روپے، قراقرم انٹرنیشنل یونیورسٹی اچ ہاسٹل دی تعمیر اتے کھیڈاں دیاں سہولتاں فراہم کرنڑ سانگے 31 کروڑ 63 لکھ 90ہزار روپے، پشاور یونیورسٹی دی اپ گریڈیشن سانگے 74 کروڑ 8لکھ روپے، ہائر ایجوکیشن کمیشن پاکستان اتے مختلف ملکاں وچال تعلیم تے تحقیق دے رابطے کوں ودھاونڑ سانگے ڈو طرفہ معاہدے دا منصوبہ پیش کیتے جیں دی لاگت 46 کروڑ 72 لکھ 12ہزار روپے تے گلگت بلتستان اچ خلائی تحقیقاتی سنٹر دی تعمیر سانگے 66 کروڑ 56 لکھ 19 ہزار روپے دا منصوبہ پیش کیتا گے، اجلاس انہاں سارے منصوبیں کوں منظور کر گھدے ۔
