زیراعظم شاہد خاقان عباسی دا نیشنل ہائی وے اتھارٹی دے تحت مکمل اتے جاری منصوبیاں بارے پریس کانفرنس توں خطاب

اسلام آباد۔31 مئی (اے پی پی) وزیراعظم شاہد خاقان عباسی آکھیا جو اجوکی حکومت گزریل پنج سالیں اچ بنیادی ڈھانچے دی ترقی اتے شاہرات تے موٹرویز دی تعمیر تے خصوصی توجہ ڈتی جئیں دے دور رس سماجی تے اقتصادی اثرات پمسن،چاریں صوبیاں اچ مجموعی طور 1750ارب روپے دی لاگت دے منصوبے مکمل،جاری یا منصوبہ بندی تے پروکیورمنٹ مراحل اچ ہن ،سی پیک منصوبیاں تے تکھے کم تھیندا پئے ،اساں جیڑھے وی منصوبے شروع کیتے انہاں آپنڑے دور اچ پورا کیتے،ماضی دے بہوں ادھورے منصوبے وی اساں پورے کیتن،60ڈینھ اچ الیکشن کراونڑ الیکشن کمیشن دہ ذمہ داری اے،الیکشن بلاتاخیر 25جولائی کوں تھیسن۔انہاں اے گالھ خمیس کوں وزیراعظم آفس اچ نیشنل ہائی وے اتھارٹی (این ایچ اے) دے تحت مکمل اتے جاری منصوبیاں دی تفصیلات بارے پریس کانفرنس توں خطاب کریندیں ہوئیں آکھی۔ایں موقع تے وفاقی وزیر اطلاعات و نشریات مریم اورنگزیب اتے این ایچ اے چیئرمین جواد رفیق ملک وی موجود ہن ۔وزیراعظم آکھیا جو شاہرات اتے موٹرویز کہیں وی ملک دی ترقی اچ بہوں اہم کردار نبھیندن اتے انہاں دے اقتصادی ،سماجی ،ثقافتی اتے بئے شعبیاں تے نہایت دور رس اثرات پمسن۔