اسلام آباد ۔ 9 مئی (اے پی پی) سپیکر قومی اسمبلی سردار ایاز صادق نیب ولوںسابق وزیراعظم نواز شریف تے بھارت کوں منی لانڈرنگ دے ذریعے 4 ارب 90 کروڑ ڈالر دی رقم بھجواونڑ دے نوٹس دی تحقیقات سانگے پارلیمانی کمیٹی دے قیام تے وفاقی وزیر پارلیمانی امور شیخ آفتاب احمد کوں ہدایت کیتی اے جو او اپوزیشن جماعتاں نال مشورہ کر تے انہاں کوں اج خمیس تئیں ڈساون ۔ بدھ کوں قومی اسمبلی اچ وزیراعظم شاہد خاقان عباسی دی کمیٹی دے قیام دے حوالے نال تجویز دے بعد پیپلز پارٹی دے پارلیمانی لیڈر سید نوید قمر آکھیا جو پارلیمنٹ نے ہی نیب دا ادارہ قائم کیتے‘ انہاں کوں اتھاں سڈ نڑ دا مقصد کم روکنڑ دے مترادف ہوسی‘ اے ہک نویں روایت ہوسی ‘ کمیٹی دے قیام دے حوالے نال اساں اپنڑی جماعت نال مشورے دے بعد ہی فیصلہ کریسوں ۔ سپیکر آکھیا کل تئیں انتظار کر گھندوں تساں مشورہ کر گھنو ۔ پی ٹی آئی دے اسد عمر آکھیا جو نیب دی رپورٹ ٹھیک ہے یا غلط او ایں حوالے نال حالی تئیں کجھ نی آکھ سگدے تاں جو اے ورلڈ بنک دی رپورٹ اے۔ جیں ڈینھ اے رپورٹ سامنڑے آئی ہئی اوں ڈینھ وزارت خزانہ کوں اے معاملہ چاونڑاں چاہیدا ہئی اے کمیٹی نی بنڑنڑیں چاہیدی ۔ ایم کیو ایم دے شیخ صلاح الدین آکھیا جو اگر اے معاملہ اداریں ڈے گیا توں اساکوں اداریں دے فیصلیں دا احترام کرنڑاں چاہیدے ۔ وزیراعظم دی کمیٹی قائم کرنڑ دے حوالے نال تجویز تے پارٹی نال مشورے دے بعد فیصلہ کریسوں ۔ جماعت اسلامی دی رکن عائشہ سید آکھیا جوکرپشن دے معاملیں تے اساں اداریں دارخ کیتا ۔ اداریں اچ سیاسی مداخلت دی وجہ توں شفافیت کائناں آسی ۔ سپیکر قومی اسمبلی سردار ایاز صادق وفاقی وزیر پارلیمانی امور شیخ آفتاب احمد کوں ہدایت کیتی جو او ایں معاملے تے ساریاں اپوزیشن جماعتاں نال مشورہ کر تے انہاں دے فیصلے دا (اج) خمیس تئیں ڈساون۔
