قومی خبر رساں ادارے اے پی پی اتے چائنا ڈیلی ملٹی میڈیا وچال خبراں دے تبادلے اتے ودھ توں ودھ اطلاعات تئیں رسائی سانگے اشتراک کار ودھاونڑ دا معاہدہ ایم ڈی اے پی پی مسعود ملک اتے ڈیلی ملٹی میڈیا چین دی ڈپٹی ایڈیٹر انچیف لائی چی لی کے پاکستان دی 70ویں سالگرہ دے حوالے نال نیوز ایجنسیاں دی عالمی کانفرنس دے موقع تے معاہدے تے دستخط کیتے

APP01-13 ISLAMABAD: May 13 – Managing Director, Associated Press of Pakistan Masood Malik and Deputy Editor-in-Chief China Daily Multimedia Jun Li shaking hand after signing an MoU at APP Headquarters. APP photo by Afzaal Chaudhry

اسلام آباد ۔ 13 مئی (اے پی پی) قومی خبر رساں ادارے ایسوسی ایٹڈ پریس آف پاکستان اتے چائنا ڈیلی ملٹی میڈیا وچال خبراں دے تبادلے اتے چین اتے پاکستان اچ ودھ توں ودھ اطلاعات تئیں رسائی سانگے اشتراک کار ودھاونڑ دے حوالے نال ہک معاہدہ طے پاگے جیں دے تحت ڈوہیں ادارے ہک ڈوجھے کوں اطلاعات تئیں رسائی دے حوالے نال ہر ممکن تعاون کریسن ۔ ایں سلسلے اچ گذریل ڈینھ اے پی پی دے منیجنگ ڈائریکٹر مسعود ملک اتے ڈیلی ملٹی میڈیا چین دی ڈپٹی ایڈیٹر انچیف لائی چی لی وچال اے پی پی ہیڈ کوارٹر اچ معاہدے تے دستخط تھن۔ اے معاہدہ پاکستان دی 70ویں سالگرہ دے حوالے نال نیوز ایجنسیاں دی عالمی کانفرنس دے موقع تے طے پاتے۔ اے پی پی وزارت اطلاعات ونشریات دے انتظامی اتے مالیاتی کنٹرول دے تحت اپنڑے فرائض سرانجام ڈیندی اے جڈاں جو ڈیلی ملٹی میڈیا چائنا چینی قوانین دے تحت قانونی حیثیت دی حامل اے۔ ہفتے دی رات ڈیلی ملٹی میڈیا چین دے نال طے پاونڑ آلے معاہدے دے تحت ڈوہیں ادارے ضمنی معاہدے تے دستخطاں دے بعد ڈو ہفتے دے اندر اندر اطلاعات تئیں رسائی دے طریقہ کاردے تعین کوں حتمی شکل ڈیسن۔ڈیلی ملٹی میڈیا چین اے پی پی کوں اپنڑے ہوم پیج تے انفرادی لاگ ان اتے پاسورڈ ڈیسی ۔ ایں طرح اے پی پی وی اپنڑے ہوم پیج تے ڈیلی ملٹی میڈیا چین کو ںانفرادی لاگ ان اتے پاسورڈ فراہم کریسی۔ ڈوہیں پاسے ایں گال تے اتفاق کیتا گیا جو ڈوہیں ادارے ضرورت دے وقت ہک مخصوص حد تئیںہک ڈوجھے کوںاطلاعات تئیں رسائی یقینی بنڑیسن۔ ایں سانگے چائنا ڈیلی ملٹی میڈیا دے ہوم پیج تے تلویں حصے جاہ مختص کیتی ویسی۔ اے جگہ میڈیا پارٹنر دے سیکشن توں تلے ہوسی تے ایندے اچ پاکستان دے قومی خبررساں ادارے (اے پی پی) دا لوگو اتے ایندے پاسے توں جاری کردہ ترائے آرٹیکل ہوسن۔ فریقین ایں طریقے نال پوری معلومات تئیں رسائی ڈیونڑ توں وی اتفاق کیتا جیں دے تحت اے پی پی ایں ضمنی معاہدے تے دستخط دے ڈو ہفتے دے اندر اپنڑے ہوم پیج تے چائنا ڈیلی دے ناں توں چائنا ڈیلی ملٹی میڈیا تئیں ہک انفرادی لاگن تے پاسورڈ دے ذریعے رسائی ڈیسی ۔ اے مخصوص ایریا اے پی پی دے ہوم پیج دی ڈوجھی سکرین توں تلے ہوسی تے ڈوہیں فریقین ایں مواد تے تبادلہ خیال اتے گال مہاڑ وی کر سگسن جیرھا جو ہک فریق ولوں ڈتا گے تے ہک فریق کوں اے فیصلہ کرنڑ دا حق حاصل ہوسی او ڈوجھے فریق دے فراہم کردہ مواد کوں استعمال کرے یا نہ کرے بشرطیکہ ایں مواد دے حوالے نال کوئی خصوصی ضوابط موجود نہ ہوون ۔ منیجنگ ڈائریکٹر اے پی پی مسعود ملک ضمنی معاہدے کوں اے پی پی دے دائرہ کار کوں وسیع کریندے ہوئیں انہاں کوں چین تے دنیا دے بئے حصیں اچ قارئین تئیں پجاونڑ دے سلسلے اچ اہم پیشرفت قرار ڈتا۔ انہاںایں موقع تے ادارے ولوں بئے ملکاں دے قومی خبررساں اداریں دے نال ایجھے معاہدیں دی صلاحیت کو ں ودھاونڑ دے عزم دا اعادہ کیتا تے آکھیا جو ایں انٹرنیشنل کانفرنس دے موقع تے اے پی پی اپنڑی نیوز کوریج کو ںوسیع تر کرنڑ سانگے مزید معاہدے متوقع ہن۔