اسلام آباد ۔ 15 مئی (اے پی پی) وزیراعظم شاہد خاقان عباسی آکھیے جو محمد نواز شریف کوں کہیں نال حب الوطنی دا سرٹیفکیٹ گھننڑ دی ضرورت کائنی ،جیرھے بندے دباﺅ برداشت کرتے پاکستان کوں جوہری قوت بنڑایا ایندے خلاف الزامات افسوسناک ہن ،قومی سلامتی کمیٹی پاکستان ولں جانڑ ں بجھ تے ممبئی حملے سانگے حملہ آوراں کوں بھیجنڑ دے الزام تے ایندی غلط رپورٹنگ دی مذمت کیتی اے ،پاکستان دی سرزمین کہیں دے خلاف استعمال نہ کرنڑ دی پالیسی تے کاربند رہسوں ‘ اگر پارلیمنٹ حقائق تے مفاہمتی کمیشن بنڑاونڑ چاہندی اے تاں کوئی اعتراض کائنی ۔ منگل کوں قومی اسمبلی اچ شاہ محمود قریشی‘ شازیہ مری‘ صاحبزادہ طارق اللہ اتے بئے ولوں محمد نواز شریف دے انٹر ویو دے حوالے نال چاتے گے نکتے دا جواب ڈیندے ہوئیں وزیراعظم شاہد خاقان عباسی آکھیا جو گزریل کجھ ڈینہاں توں ہک مسئلہ چاتا ویندے پے جیرھا جو اخباراں دی زینت بنڑدا پے ۔جیرھے دوستاں ایوان اچ دھواں دھار تقریراں کیتیاں ہن ‘ انہاں نواز شریف دا او نٹر ویو کائناں پڑھیا ہوسی ۔اگر او انٹر یو پڑھدے تاں اے گال نہ کریندے ۔وزیراعظم آکھیا جو غلط الزام لاونڑ توں پہلے سوچنڑاں چاہیدے جو او ایں بندے تے الزام لیندے پن جیرھے بندے پاکستان دا دفاع ناقابل تسخیر بنڑا ڈتے تے دباﺅ برداشت کرتے پاکستان کوں ایٹمی قوت بنڑایا ۔انہاں آکھیا بھارتی میڈیا سابق وزیراعظم دے حوالے نال جیرھا ایشو چاتے او محمد نواز شریف دے ہک تفصیلی انٹرویو دا معمولی جیہا حصہ ہئی ۔ بھارتی میڈیا اپنڑے مقاصد سانگے تروڑ مروڑ تے پیش کیتا تے اے اساڈی بد قسمتی اے جو بھارت اپنڑے مقاصدسناگے جیرھا کم کیتے اساں وی اوہے گالھیں لکھنڑ شروع کر ڈتیاں تے بھارتی مقصد سانگے استعمال تھیونڑ شروع تھے ۔کیااساں اپنڑے آپ کوں بھارتی مقاصد سانگے استعمال تھیونڑ دی اجازت ڈیسوں ۔وزیراعظم آکھیا محمد نواز شریف جیں ایشو تے گال کیتی اے ایندے تے ماضی اچ جنرل (ر) پرویز مشرف ‘ جنرل (ر) شجاع پاشا‘ جنرل درانی ‘ عمران خان اتے رحمان ملک دے بیانات وی موجود ہن ۔ وزیراعظم آکھیا جو انتہا پسنداں تے غیر ریاستی عناصر بارے اچ ہک جملہ غلط طریقے نال رپورٹ تھیا اے‘ نواز شریف اے کائنی آکھیا جو جیرھے لوکاں ممبئی تے حملہ کیتے او لوک پاکستان جانڑں بجھ تے بھیجے ہن ۔اے اخذ شدہ تاثر بے بنیاد تے حقائق دے منافی تے مس رپورٹ اے ۔ وزیراعظم آکھیا جو اگر پارلیمان دے ارکان حقائق اتے مفاہمتی کمیشن بنڑاونڑ چاہندے ہن تان اساں ایں سانگے تیار ہوں ایں طرح دے کمیشن تے گال تھیونڑیں چاہیدی اے لیکن قومی سلامتی متعلق معاملیں کوں پریس کانفرنس دا موضوع بنڑاونڑ توں گریز کرنڑاں چاہیدے کیں جو اے ملک دے مفاد اچ کائنی ۔
