کراچی۔ 11مئی(اے پی پی)وزیراعظم شاہد خاقان عباسی کراچی اچ پاکستان دی پہلی ڈیپ سی کنٹینرپورٹ دے پہلے فیز دا افتتاح کر ڈتے۔ ایں موقعے تے تقریب نال خطاب کریندے ہوئیں وزیراعظم دا آکھنڑ ہا جوجدید ترین ڈیپ سی پورٹ دے بنڑن نال پاکستان دے وسط ایشیائی ملکاں نال روابط ودھسین، تجارت، سرمایہ کاری اتے درآمدات برآمدات کوں وی ودھارا ملسی۔وزیراعظم شاہد خاقان عباسی دا آکھنڑ ہا جوجنتی وی ترقی تھئی اے او جمہوری دور اچ تھئی اے، وزیراعظم آکھیا جو میکوں خوشی ہے جو ہر ہفتے ہک منصوبے دا افتتاح کر یند ے پئے ہیں ، جیکر ملک اچ جمہوری حکومت نہ ہوندی تاں ملک اچ اے تلا ترقی نہ تھیندی ،اساںثابت کیتے جو جمہوری حکومت ہی ملک کوں چیلنجاں اچوں کڈہنڑ دی صلاحیت رکھیندی ہے،چینلجاں دے باجود مسلم لیگ ن دی حکومت بہوں چنگاں کم کیتے، موجود ہ حکومت نا صرف نویں منصوبے شروع کیتن بھل پرانڑے وی مکمل کیتن،بجلی بحران تے بہوں حدتئیں قابو پا گھداگئے،اٹھارہاںسو کلومیٹر ہائی ویز زیر تعمیر ہین،سی پیک منصوبیاں کوں تیکھے مکمل کیتا ویندا پئے جیندے نال پاکستان ہی نئیں خطے اچ معاشی اتے سماجی ترقی دا انقلاب آسی۔ انہاں دا آکھنڑ ہا جو آئین ہر ادارے دے اختیارات اتے حدود مقرر کیتن،ہر ادارے کوں آئین دے مطابق کم کرنڑا چاہیدے۔وزیراعظم آکھیے جو عام انتخابات آزادانہ، منصفانہ اتے ویلھے تے تھیونڑے چاہیدن۔
