اسلام آباد ۔ 15 مئی (اے پی پی) وزیر خزانہ مفتاح اسماعیل کھاداں تے ٹیکس اچ گھٹکی ‘ سرکاری ملازماں دے کنوینس الاﺅنس اتے صنعتاں دے فروغ دے حوالے نال سینٹ دی مجموعی طور تے 42 سفارشاں دی کلی اتے جزوی طور تے منظوری دا اعلان کریندے ہوئیں آکھے جو اساڈا مقصد ملک دا مالیاتی استحکام اتے جمہوریت دا فروغ ہے‘ غریب اتے گھٹ آمدنی آلے لوکاں سانگے ٹیکساں اچ جیرھاریلیف ڈتا گئے ملکی تریخ اچ ایندی مثال نی ملدی‘ بجٹ اچ زرعی شعبے اتے کاشتکاراں دی فلاح تے بہبود سانگے وی تریخی اقدامات کیتے گئے ہن۔ منگل کوں قومی اسمبلی اچ وزیر خزانہ مفتاح اسماعیل بجٹ 2018-19ءتے بحث کوں سنبھیندے ہوئیں آکھیا جو بجٹ تجویزاں کوں چنگا بنڑاونڑ اتے رہنمائی تے اپوزیشن سمیت سارے ارکاناں دے شکرگزار ہسے۔انہاں آکھیا جوایں ایوان دے منتخب اراکاناں کوں مالیاتی تجویزاں تے رائے ڈیونڑ دا حق حاصل ہے۔ انہاںسندھ دے وزیراعلیٰ ولوں ترائے مہیناں دا بجٹ پیش کرنڑ تے شکریہ ادا کریندے ہوئیں آکھیا جو ایہ سمجھ توں باہر ہے جو انہاں ترائے مہینے دابجٹ کیوں پیش کیتا اتے ترائے مہینے بعد تنخواہیں اچ ودھارے دے حوالے نال ملازم کیا کریسن۔ انہاں آکھیا جو بلوچستان دے وزیراعلیٰ ہک مہینے دا بجٹ پیش کیتے اساںانہاں دے وی شکرگزار ہسے۔ انہاں آکھیا جو اساڈا مقصد ملک دی فلاح اتے جمہوریت دا استحکام ہے۔ انہاں آکھیا جو سینٹ دیاں سفارشاں اساں سانگے بے حد قابل احترام ہن،اساں چیئرمین سینٹ اتے سینٹ دی قائمہ کمیٹی خزانہ دے چیئرمین فاروق ایچ نائیک سمیت سارے ایوان بالا دے ارکاناں دا شکریہ ادا کریندوں جنہاں جماعتی وابستگیاں کوں ہک پاسے رکھ تے157 سفارشاں تیار کرتے اساکوں بھیج ڈتیاں۔ انہاں سفارشاں وچوں108 دا تعلق پی ایس ڈی پی نال ہا جینکوں منصوبہ بندی کمیشن کو ںبھجواڈتا گئے اتے باقی 49 سفارشاں وچوں42 سفارشاں کلی اتے جزوی طور تے منظور کرگھدیاں گن۔ حکومت بجٹ اچ زندگی دے ہر شعبہ نال تعلق رکھنڑ آلے لوکاں کوں ٹیکس اچ جیرھا ریلیف ڈتے ایندی مثال70 سالاں دی تریخ اچ نی ملدی ۔ پٹرول‘ ڈیزل تے 30 ارب روپے دا کوئی ودھ ٹیکس نی لاتا گیا ۔ پٹرولیم لیوی دی اپر حد اچ ودھارا قنونی تقاضا ہا۔ ملک وچوں غربت مکاونڑ خاتمے سانگے بے نظیر انکم سپورٹ پروگرام دے فنڈز ترائے گنا ودھا ڈتے گن۔ جڈاںجواساںآئے تاں بیت المال دابجٹ ڈو ارب روپے ہا جیرھا جو ہنڑ چھ ارب روپے تھی گئے اتے آندے مالی سال اچ 10 ارب روپے تئیں ودھا ڈتا ویسی۔ ملک اچ بجلی صارفین کوں سستی بجلی ڈوینڑ سانگے 150 ارب روپے دی سبسڈی ڈتی ویندی پی ہے۔ حکومت دیاں چنگیاں پالیسیاں دی وجہ نال ملکی برآمدات ترکھے ودھدیاں پن۔ مارچ اچ برآمدات 24 فیصد اتے اپریل اچ 18 فیصد ودھارا تھئے ۔ درآمدات اچ مسلسل گھٹکی گھن تے آندے پئے ہسے ‘ اپریل اچ ملکی برآمدات صرف ڈو فیصد ودھیاں ہن۔ جڈاںاساں حکومت سانبھی تاں ملک اچ 18اٹھاراں گھنٹے دی لوڈشیڈنگ ہائی‘ پنج سالیں اچ حکو مت12230 میگاواٹ بجلی دا ودھارا کیتا۔ گردشی قرضیاں دا سلسلہ مکاونڑ سانگے اقدامات کیتے اتے آونڑ آلے ڈو ہفتیاں اچ گردشی قرضے بئے گھٹ کرنڑ دے اقدامات کر یندے پئے ہسے۔ انہاں آکھیا جو اپوزیشن ملکی قرضیاں دے حوالے نال جیرھی گالھ کیتی میں ایندی وضاحت کرنڑ چاہنداں جوا یہ قرضے بجلی دی پیداواری صلاحیت ودھاونڑ اتے ملکی انفراسٹرکچر چنگا کرنڑ سانگے استعمال کیتے گن۔ وزیر خزانہ آکھیا جو برآمدات ودھاونڑ سانگے وزیراعظم دی خصوصی ہدایت تے نواں برآمدی پیکج ڈیندے پئے ہسے۔ بجٹ اچ پہلے توں ہی 24 ارب روپے ایں پیکج سانگے رکھے گئے ہن بی ضرورت پئی تاں سپلیمنٹری گرانٹ توں بئی رقم ڈتی ویسی ۔ آئی ٹی دے شعبے سانگے مراعات دا اعلان کریندے ہوئیں انہاں آکھیا جو آئی ٹی خدمات تے کیش ایوارڈ جاری کریندے پئے ہسے۔ وفاقی دارالحکومت اچ آئی ٹی تے سیلز ٹیکس دی شرح 15 فیصد توں گھٹ کر تے پنج فیصد کیتی ویندی پی ہے۔ صوبیں کوں وی ایں حوالے نال اقدامات کرنڑ سانگے آکھیا ویندا پئے۔ ملک اچ زراعت دے شعبے کوں ترقی ڈیونڑ سانگے بئے اقدامات کریندے پئے ہسے۔ ساریاں کھاداں تے ٹیکس دی شرح گھٹ کر تے ڈو فیصد کرڈتی گی ہے۔ کھیتاں اچ جپسم دی گھٹکی کوں پورا کرنڑ سانگے برآمدات تے 20 فیصد ڈیوٹی لاتی ویندی پی ہے تاں جو ملکی جپسم دی صنعت کوں مضبوطی ملے۔ سرکاری ملازماں سانگے مراعات دا اعلان کریندے ہوئیںوزیر خزانہ آکھیا جو گریڈ ہک توں گریڈ 16 تئیں دے ملازماں سانگے دیر تئیں کم کرنڑ آلے ملازماں دے کنوینس الاﺅنس اچ 50 فیصد ودھارا کیتا ویندا پئے۔ گھٹ آمدن آلیاں سانگے 25 لکھ روپے تئیں دے مکان دے ٹیکس اچ 50 فیصد گھٹکی کیتی ویندی پی ہے۔ نان فائلر تے 40 لکھ روپے تئین دی جائیداد خریدن دی حد کوں ودھا تے 50 لکھ کیتا ویندا پئے۔ ماچس دی صنعت سانگے سیلز ٹیکس دے استثنیٰ دا اعلان کیتا ویندا پئے تاں جو کاروباری سرگرمیاں کوںفروغ ملے۔
