اسلام آباد ۔ یکم مئی (اے پی پی) وفاقی وزیر اطلاعات ونشریات ،قومی تاریخ و ادبی ورثہ مریم اورنگزیب آکھے جو پاکستان سمیت ساری دینا دے مزدوراں کوں سلام پیش کریندے ہئیں ، ساری دنیا اچ تھیونڑ آلی ترقی اچ مزدوراں بنیادی کردارادا کیتے ، شکاگو دے مزدوراں دی قربانی مزدوراں دے حقوق کوں دنیا اچ تحریک دی شکل ڈتی جیہڑی جو مسلسل اگوں ودھدی پئی ہے ۔ حکومت مزدوراں دے حالات کار بہتر بنڑاونڑ اتے انہاں کوں روزگار دے چنگے موقعے ڈیونڑ کیتے اقدامات کریندی پئی ہے اتے متعلقہ اداریاں دی اصلاح اتے نظم و ضبط کیتے ٹھوس منصوبہ بندی کیتی ہے، مزدوراں دی صحت، خوراک اتے انہاں کوں مختلف ہنر سکھا تے ترقی دے عمل کوں پائیدار بنڑایا ونج سگدے ۔ منگل کوں یوم مئی دے حوالے نال آپ دے پیغام اچ وفاقی وزیر اطلاعات ونشریات مریم اورنگزیب اے گالہیں آکھیاں۔ انہاں آکھیا جو اللہ تعالی محنت کرنڑآلے کوں آپنڑاں دوست قرار ڈے تے اوندی عزت وعظمت ودھا ڈتی ہے اتے مزدور دا پسینہ خشک تھیونڑ توں پہلے اجرت دی فراہمی دا حکم ڈتے ۔
