اسلام آباد ۔ 07 مئی (اے پی پی) وزیر اعظم شاہد خاقان عباسی آکھیے جو پاکستان مستقبل اچ سرمایہ کاری دے حوالے نال اہم منزل ہو سی، غربت مکاونڑ اتے معاشی خوشحالی سانگے شرح نمو9 فیصد تئیںگھن ونجنڑ بہوں ضروری ہے، اساں 5سالاں اچ ملک توں دہشت گردی، توانائی بحران مکائے، غیر ملکی سرمایہ کاراں کوں پاکستان اچ سرمایہ کاری سانگے دعوت ڈیندوں ۔ وزیراعظم سنوار کوں سرمایہ کاری بورڈ اتے جنگ گروپ دے تعاون نال سرمایہ کاری کانفرنس نال خطاب کریندے پئے ہن۔ کانفرنس دا موضوع شرح نمو کوں 9 فیصد تئیں گھن ونجنڑ ہئی۔ وزیراعظم آکھیا جو 5 سال اچ چیلنج دے باوجود ترقی آلے پاسے ودھ گیوں، پاکستان توں دہشت گرداں دیاں پناہ گاہیں کوں ختم کر ڈتا گے، بنیادی ڈھانچے اچ ٹھوس سرمایہ کاری کیتی گئی، ملک اچ 17 سو کلومیٹر موٹروے بنڑائی ہے، اقتصادی زونزتوںروزگار دے مواقع ودھسن۔ وزیر اعظم آکھیا جوملک اچ پہلی واری ٹیکس اصلاحات لاتیاں گن ، ترقیاتی پالیسیاں تے عمل کریندا پئے۔ وزیراعظم آکھیا جو ملک توں غربت مکاونڑ سانگے شرح نمو کوں 9 فیصد تئیں گھن ونجنڑ بہوں ضروری ہے، اساڈی حکومت آئی تاں اوں ویلھے شرح نمو 3 فیصد ہائی جڈانجو جبکہ اساں اینکوں 6 فیصد کیتے۔ انہاں آکھیا جوسینکڑاں کمپنیاں پاکستان اچ سرمایہ کاری کریندیاں پن، 4 سال میںکنے وزارت پٹرولیم تے قدرتی وسائل دا منصب رہیا اتے تیل تے گیس دے شعبہ اچ کہیں ہک وی کمپنی دی پاکستان اچ سرمایہ کاری ضائع کائنی تھی ۔ انہاں آکھیا جو پاکستان اچ سرمایہ کاری دے موقع ودھ سگن۔ ملک سرمایہ کاراں سانگے پہلی ترجیح بنڑدا پئے ۔ انہاں آکھیا جو درپیش چیلنج تے کامیابی نال قابو پاونڑ کیتے، 5 سال اچ چیلنجز دے باوجود ترقی آلے پاسے ودھ گیوں، ملک اچ گیس دی گھٹکی مکائی، بجلی دی گھٹکی تے قابو کرنڑ سانگے اقدامات کیتے۔ وزیر اعظم آکھیا جو اقتصادی راہداری ملک دی ترقی دا وژن ہے،ا یہ علاقائی رابطیں دا اہم جزو ہے، سی پیک دے نتیجہ اچ مسابقت دی فضاءنال معاشی ترقی اچ ودھارا تھیسی۔انہاں آکھیا جومغربی چین کو ںپاکستان دی بندر گاہیں نال جوڑن دے اکثر منصوبے مکمل تھی گن ۔ وزیر اعظم آکھیا جوملکی تریخ اچ ڈوجھی حکومت اپنڑی آئینی مدت پوری کر یندی پی ہے۔ انہاں آکھیا تعلیم دے شعبہ اچ چنگائی اتے 100 فیصد انرولمنٹ یقینی بناونڑ سانگے 100،100، 100 پروگرام تے عمل کریسوں اتے صوبائی حکومتاں دے کٹھے رل مل تے ایں پروگرام کوں کامیابی نال پورا کریسوں ۔ ایندے علاوہ نیوٹریشن پروگرام کوں عملی جامہ پوایا ویندا پئے۔ انہاں آکھیا جو پاکستان اچ اقتصادی زونز بنڑاونڑ سانگے اقدامات کیتے گئے ہن ایندے نال ملک اچ روزگار ودھسی۔ وزیراعظم ایںموقع تے سرمایہ کاراں کوں پاکستان اچ سرمایہ کاری دے دوران مکمل تعاون دی یقین دہانی کرویندے ہوئیں آکھیا جو اتھاں انہاں دا سرمایہ مکمل محفوظ راہسی اتے انہاں کوں سرمایہ کاری توں چنگا منافع ملسی۔ وزیر اعظم آکھیا جوپاکستان مستقبل اچ سرمایہ کاری دے حوالے نال ہک اہم منزل ہے ۔پاکستان دے حوالے نال جیرھی تصویر پیش کیتی ویندی پی ہے حقیقت ایں توں مکمل مختلف ہے۔
