چیئرمین سینیٹ صادق سنجرانی دا اگو تے قومی اسمبلی توں آونڑ آلے بل فوری منظور کرنڑ دی بجائے کمیٹیاں کوں بھجواونڑ دی تجویزتے اتفاق

اسلام آباد ۔ 25 مئی (اے پی پی) چیئرمین سینیٹ صادق سنجرانی سینیٹ دے ڈو سابق چیئرمیناں دی ایں تجویز نال اتفاق کیتے جو اگو تے قومی اسمبلی توں آونڑ آلے بل فوری طورتے منظور کرنڑ دی بجائے کمیٹیاں کوں بھجوائے ویسن تاں جو انہاں تے بحث تھی سگے۔ایوان بالا دے اجلاس اچ سابق چیئرمین سینیٹ سینیٹر رضا ربانی آکھیا جو قومی اسمبلی توں منظورتھی تے آونڑ آلے بلاں اچ غلطیاں اتے کمزوریاں ہوندن جیکر سینیٹ دیاں متعلقہ کمیٹیاں اچ زیر بحث آونجن تاں انہاں دی درستگی کیتی ونج سگدی اے۔ سابق چیئرمین سینیٹ فاروق ایچ نائیک آکھیا جو کوئی وی بل آوے تاں ایکوں لازمی کمیٹی کوں بھجوایا ونجے۔ چیئرمین سینیٹ تجویزنال اتفاق کیتے۔قائد حزب اختلاف سینیٹر شیری رحمان وی سینیٹ دے ڈو سابق چیئرمیناں دی تجویز دی تائید کیتی اتے آکھیا جو اگو تے کمیٹی کوں بھیجے بغیر بل منظور نہ کیتا ونجے۔