اسلام آباد ۔ 9 مئی (اے پی پی) وزیراعظم شاہد خاقان عباسی آکھیے جوچیئرمین نیب جیں طرح چار ارب 90 کروڑ ڈالر بھارت بھجواونڑ دی ہک اخباری خبر کو ںبنیاد بنڑا تے سابق وزیراعظم دے خلاف تحقیقات دا حکم ڈتے اے اساں سانگے تشویش اتے دنیا اچ پاکستان دی بدنامی دا باعث اے‘ اے بہوں اہم اتے سنجیدہ مسئلہ اتے دشمن ملک کوں پیسے بھیجنڑ دا الزام اے ،ایندی تحقیقات سانگے خصوصی پارلیمانی کمیٹی بنڑائی ونجے ،جیرھی نیب دے چیئر مین کوں سڈ تے انہاں توں معاملے دی تحقیقات کرتے ایندی رپورٹ ایوان اچ پیش کرے تاں جو پاکستان دے عوام دے سامنڑے حقائق آ سگن ، اپوزیشن کوں پیشکش کریندوں جو نیب قانون دی جیرھی ترامیم تے اتفاق رائے تھی گے او ایوان اچ پیش کیتیاں ونجن اساں ایندے تے بحث کرنڑ کوں تیار ہوں۔ وزیراعظم شاہد خاقان عباسی بدھ کوں قومی اسمبلی اچ اظہار خیال کریندے ہوئیں آکھیا جو میں ایندے توں پہلے ایں ایوان دے اندر تے باہر آکھیے جو نیب دی وجہ توں ملک دے اندر جیرھے حالات پیدا تھیندے پن او چنگے کائنی ۔نیب دا ادارہ سیاسی جماعتاں کوں تروڑنڑ تے وفاداریاں تبدیل کرنڑ سانگے ہک آمر بنڑایا ہئی ۔‘ پاکستان پیپلز پارٹی کوں وی اقتدار ملیااساں وی حکومت اچ ہوں تاں جو بد قسمتی اے اتفاق رائے تھیونڑ دے باوجود اساں نیب دا ایجھا ادارہ نہ بنڑا سگیے جیرھا جو سیاستداناں تے اثر انداز تھیونڑ تے انہاں دے خلاف کاروائیاں کرنڑ دی بجائے ملک اچ کرپشن دے خلف اپنڑاں کردار ادا کر سگے تے انصاف دے تقاضے پورے کر سگے ۔وزیراعظم آکھیا جو ہک ترمیم اچ ترائے چار سال لگے تے ایندے تے اتفاق رائے وی ہئی تاں جو ایں کوں اساں ہاﺅس اچ پیش کائنی کر سگیے تے نہ ہی ایندی منظوری تھی سگی اے ۔انہاں آکھیا مستقبل دے فیصلے تاں آندی حکومت کرنڑیں ہن ۔سابق وزیرا عظم تے ایں وقت نیب کیس چلدا پے اتھوں انصاف دی توقع نظر کائنی آندی پئی ۔جیں طرح ٹرائل تھیندا پے انصاف دا تقاضا اے ہے جو انصاف تھیندا نظر کائنی آندا پیا تے انصاف تھیونڑاں وی چاہیدے ۔سابق وزیراعظم دیاں ہفتے اچ چھی چھی پیشیاں تے کجھ اوقات اچ ترائے ترائے پیشیاں تھیندیاں پن ۔نیب دی تاریخ اچ ایندی مثال کائنی ملدی ۔وزیراعظم آکھیا اساں شکایت کائنی کریندے اے ریکارڈ چیزاں ہن ۔ وزیراعظم شاہد خاقان عباسی آکھیا 8 مئی کوں نیب ولوں پریس ریلیز جاری کیتی گی جیں اچ چیئرمین نیب سابق وزیراعظم اتے بئیں دے خلاف چار ارب 90 کروڑ ڈالر منی لانڈرنگ دے ذریعے بھارت بھجواونڑ دی میڈیا رپورٹ تے تحقیقات داحکم ڈتا۔ اے کم ماضی اچ تھیندے ہن جو ایجھے واقعات دا سر پیر کائنی ہوندا ،اے اساں سانگے تشویش تے دنیاچ پاکستان دی بدنامی دا باعث اے ۔دنیا کیا سوچیسی جو چیئر مین نیب اکھیندا پے سابق وزیراعظم چار ارب 90 کروڑ ڈالر بھارت بھجوائے ہن۔ انہاں آکھیا پاکستان دا پورا بجٹ 35 ارب ڈالر اے۔ جڈاں کہیں ادارے در سربراہ ایں قسم دی گال کرے تاں پریس ریلیز جاری کرے تاں سوچو ایں ادارے اچ بئے کیا کم تھیندے پن ،اے خطرے دی گھنٹی اے ۔انہاں آکھیا ایں طرح دے اقدامات نال ملک نی چل سگدا ۔ایں قسم دے ادارے تے چیئر مین ہوسن تاں ادارہ کیویں انصاف کریسی ۔ وزیراعظم آکھیا شرمندگی ایں گال دی اے جو انہاں دا ناں اتھوں ہی میں تے قائد حزب اختلاف سید خورشید شاہ اتفاق رائے نال بھیجا ہئی۔ وزیراعظم آکھیا اے اساڈا حق تے ذمے واری اے جو ایں قسم دیاں گالھیں تھیون تاں عوام تے ہاﺅس دے سامنڑے ثبوت رکھیے ونجن۔ وزیراعظم شاہد خاقان عباسی آکھیا اے ہاﺅس چیئرمین نیب کوں سڈے تے انہاں توں پچھے جو تیکوں اے اختیار کیں ڈتے تساں ڈے کیاں ثبوت ہن ‘ ایندا ریکارڈ پیش کروایں طرح کہیں تے الزام نی لاتا ونج سگدا ۔ وزیراعظم آکھیا اے اقدام قبل از انتخابات دھاندلی دے زمرے اچ آندے۔ وزیراعظم تجویز ڈتی جو رول 244 بی دے تحت خصوصی کمیٹی بنڑائی ونجے جیرھی ایں معاملے دی تحقیقات کرے ۔
