اسلام آباد ۔ 5 جون (اے پی پی) نگران وزیراعظم جسٹس (ر) ناصرالملک بجلی دے شعبے دی پائیداریت اتے ایں شعبے دے مجموعی نظام کوں موثربنڑاونڑ سانگے وزارت پاورکوں بجلی دے شعبے اچ ضیان کوں گھٹ کرنڑ سانگے اقدامات کرنڑ دی ہدایت کیتی اے ۔اے گال انہاں منگل کوں وزیراعظم آفس اچ پاورسیکٹر متعلق ہک بریفنگ اچ آکھی ۔ بریفنگ اچ سیکرٹری پاورڈویژن ، منیجنگ ڈائریکٹر پیپکو، ایم ڈی این ٹی ڈی سی اتے بئے سینئر حکام ایں موقع تے موجود ہن ۔ سیکرٹری پاورڈویژن وزیراعظم کوں ملک اچ بجلی دے شعبے دی مجموعی حالت زار بشمول بجلی دی پیداوار، ترسیل تے تقسیم متعلق بریفنگ ڈتی۔ وزیراعظم کو ںموجودہ اتے مستقبل قریب اچ بجلی دی ممکنہ طلب بارے ڈسایا گیا ۔ وزیراعظم کوں ڈسایا گیا جو 2013 اچ ملک اچ بجلی دی پیداواری استعداد 18753میگاواٹ ہئی، ایں وقت ملک اچ بجلی دی پیداواری استعداد 28 ہزار704 میگاواٹ اے۔ وزیراعظم کوں ڈسایا گیا جو موسمی صورتحال تے ایندے نتیجے اچ پانڑیں دی فراہمی اچ گھٹکی پاروں مئی 2018 اچ پانڑیں نال 3090 میگاواٹ بجلی حاصل کیتی ویندی پئی اے جڈاں جو 2015 اچ پانڑیں نال بجلی دی پیداوار 6333 میگاواٹ ہئی۔ وزیراعظم کوں ڈسایا گیا جو رمضان شریف دے حوالے نال وفاقی کابینہ جیرھے لوڈ مینجمنٹ پلان دی منظوری ڈتی ہئی ایندے تے سختی نال عمل در آمد کوں یقینی بنڑاونڑ سانگے سارے اقدامات کیتے ویندے پن ۔ اجلاس اچ انتظامی اتے تکنیکی مسلے جیرھے جو سسٹم دے ضیان تے بجلی چوری تے منتج تھیندے پن دا جائزہ گھدا گیا ۔ وزیراعظم مختلف ڈسکوز اچ بارے ضیان تے تشویش دا اظہار کیتا تے وزارت پاور کوں انہاں ضیان اچ گھٹکی سانگے وختی اقدامات کرنڑ دی ہدایت کیتی ۔
