اسلام آباد ۔ 8 جون (اے پی پی)نگران وزیر اعظم ناصر املک دی صدارت اچ قومی سلامتی کمیٹی دا اجلاس تھئے جیندے اچ فنانشنل ایکشن ٹاسک فورس اتے بئے عالمی اداریاں نال رل تے کم کرنڑدا عزم کیتا گئے۔25 ویں قومی سلامتی کمیٹی اجلاس اچ وزیر دفاع و خارجہ عبداﷲ حسین ہارون، وزیر خزانہ محترمہ شمشاد اختر، وزیر داخلہ محمد اعظم خان، وزیر قانون، اطلاعات و نشریات سید علی ظفر، چیئرمین جوائنٹ چیفس آف سٹاف کمیٹی جنرل زبیر محمود حیات، چیف آف آرمی سٹاف جنرل قمر جاوید باجوہ، پاک بحریہ دے سربراہ ایڈمرل ظفر محمود عباسی، پاک فضائیہ دے سربراہ ایئر چیف مارشل مجاہد انور خان، قومی سلامتی دے مشیر لیفٹیننٹ جنرل ناصر خان جنجوعہ، ڈی جی آئی ایس آئی لیفٹیننٹ جنرل نوید مختار اتے سینئر سول و فوجی حکام شریک تھین۔وزیر خزانہ شمشاد اختر فنانشل ایکشن ٹاسک فورس دے پیرس اچ آندے اجلاس اتے ایف اے ٹی ایف سانگے ملک ولوں ہنڑ تئیں انتظامی اتے قانونی اقدامات بارے تفصیلی بریفنگ ڈتی۔ فنانشل ایکشن ٹاسک فورس فریم ورک دے تحت ملک دی بین الاقوامی ذمہ داریاں پورا کرنڑ کیتے اقدامات تے پیش رفت تے اطمینان کیتا گیا۔کمیٹی ہدایت کیتی جو آندے اجلاس اچ ایف اے ٹی ایف سیکریٹریٹ کوں پیش رفت بارے ڈسایا ونجے۔ وزیراعظم امریکی نائب صدر مائیک پینس نال 7 جون کوں تھیونڑ آلی ٹیلیفونک گالھ مہاڑبارے وی ڈسایا۔
