اسلام آباد ۔ 12 جون (اے پی پی) نگران وزیر خزانہ، ریونیو و اقتصادی امور ڈاکٹر شمشاد اختر آکھیے جو نگران حکومت دا آئی ایم ایف نال کوئی پروگرام زیر غور کائنی،اگو تے پٹرولیم مصنوعات دیاں قیمتاں دا تعین ویلھے سِر کرنڑاں ہوسی،ملکی معیشت دے وڈے شعبیان اچ ترقی تھئی اے بھل کرنٹ اکاﺅنٹ خسارہ اتے قرضیاں اچ ودھارے دے مسائل موجود ہین۔او اسلام آباد اچ وزیر اطلاعات و نشریات بیرسٹر علی ظفر دے نال کٹھی پریس کانفرنس کریندیاں پیان ہن۔نگران وزیر خزانہ آکھیا جو پٹرول دا مُل عالمی منڈی دے مطابق ودھایا گئے،ایں سانگے ویندی حکومت ولوں فیصلہ نہ تھیونڑ توں بعد نگران حکومت پورے صلاح مشورے توں بعد فیصلہ کیتے جو عالمی منڈی اچ ودھارے دا 50فیصد حکومت برداشت کریسی بھل اگُو تے انہاں قیمتاں اچ ویلھے سر ایڈجسٹمنٹ کیتے پہلے توں موجود پالیسی جاری رکھی ویسی۔پاکستان دی اقتصادی صورتحال بارے انہاں آکھیے جو آئی ایم ایف نال پروگرام کیتے کوئی وی فیصلہ کرنڑ آندی منتخب حکومت دااختیار ہوسی، ساڈا اینجھا کوئی پروگرام کائنی،جیکر لوڑھ پئی تاں تکنیکی مشاورت کیتے مقامی یا عالمی ماہرین نال رابطہ کریسوںحالی آئی ایم ایف نال کہیں پروگرام کیتے معاہدے یا باضابطہ مذاکرات دی کوئی گالھ کائنی۔انہاں آکھیے جو جی ڈی پی دی شرح نمو 5.8 فیصد ریکارڈکیتی گئی اے،طلب دے نال رسد وی چنگی تھئی اے اتے سرمایہ کاری وی ٹردی پئی اے بھل کور انفلیشن اچ ودھارا تھیندا پئے،تیزی نال ودھدا کرنٹ اکاﺅنٹ خسارہ ہک وڈا مسئلہ اے جیہڑا 8.9 بلین ڈالرہداف دے مقابلے اچ 14 ارب ڈالرتئیں ودھ گئے جڈاں جو مالیاتی خسارہ وی ودھ تے 4.1 فیصد ہدف دے مقابلے اچ 6.1 فیصد تئین پج گئے، مجموعی سرکاری قرضے تیزی نال جی ڈی پی دے 70 فیصد تئیں پج چکین جیہڑے 2013اچ 64 فیصد ہن۔
