لاہور۔26 جون(اے پی پی )وفاقی وزیر اطلاعات و نشریات اتے آبی وسائل سید علی ظفر آکھیے جو ملک کوں پانڑیں دی بحران توں کڈھنڑ سانگے وفاقی تے صوبائی سطح تے مربوط کوششاں دی ضرورت اے ،پانڑیں تے پن بجلی دے منصوبیں دی تعمیر سانگے واپڈا دے اقدامات لائق تحسین ہن ۔او منگل کوں واپڈا ہاﺅس لاہور دے دورے دے دوران گال مہاڑ کریندے پے ہن ۔ چیئرمین واپڈا لیفٹیننٹ جنرل (ر) مزمل حسین وفاقی وزیر کوں ملک اچ پانڑیں تے پن بجلی دے امور تے بریفنگ ڈتی ۔ وفاقی وزیر کوں دیامربھاشا ڈیم اتے مہمند ڈیم سمیت واپڈا دے بئے منصوبیں بارے ڈسایا گیا ۔ چیئرمین پانڑیں تے بجلی دیاں ودھدیاں ہویاں ضرورتاں کوں پورا کرنڑ سانگے واپڈا دیاں کوششاں بارے تفصیلات دا ذکر کریندے ہوئیں ڈسایا جو اگست 2017ءتوں واپڈا چار وڈے منصوبے پورے کر گھدن جیں پاروں بلوچستان دے ضلع ڈیرہ بگٹی میں 72ہزار ایکڑ ازمین کاشت تھیندی پئی اے جڈاں جو نیشنل گرڈ اچ ڈو ہزار 487میگاواٹ بجلی شامل تھیندی پئی اے ۔پورے تھیونڑ آلے منصوبیں اچ کچھی کینال پراجیکٹ دا پہلا مرحلہ، گولن گول، تربیلا چوتھا توسیعی منصوبہ اتے نیلم جہلم ہائیڈرو پاور پراجیکٹ شامل ہن۔ زیر تعمیر منصوبیں اچ کرم تنگی ڈیم دا پہلا مرحلہ 2020ءاچ پورا تھیونڑ دی توقع اے جڈاں جو 2ہزار 160میگاواٹ پیداواری صلاحےت دے داسو ہائیڈرو پاور پراجیکٹ (سٹیج I-)توں 2023اچ بجلی دی پیداوار شروع تھی ویسی۔وفاقی وزیر کو ں ڈسایا گیا جو دیامربھاشا ڈیم اور مہمند ڈیم تے تعمیر اتی کم مالی سال 2018-19ءدے دوران شروع تھیسی ۔ایں موقع تے گال مہاڑ کریندے ہوئیں وفاقی وزیر سید علی ظفر پانڑیں تے پن بجلی دے منصوبے دی تعمیر سانگے واپڈا دے اقدامات تے اطمینان دا اظہار کیتا۔ انہاں آکھیا جو ملک کوں پانڑیں دے بحران توں کڈھنڑ سانگے وفاقی تے صوبائی سطح تے مربوط کوششاں دی ضرورت اے ۔
