اسلام آباد ۔ 17 جولائی (اے پی پی) اسلام آباد ہائی کورٹ سابق وزیر اعظم محمد نواز شریف ، مریم نواز اتے کیپٹن (ر)محمد صفدر ولوں احتساب عدالت دی سزا معطلی،بئے نیب ریفرنسز ڈوجھی عدالت اچ منتقل کرنڑ اتے فیصلہ آونڑ تئیں ضمانت اُتے رہائی بارے درخواستاں اُتے فریقین کو ںنو ٹسزجاری کریندے ہوئیں سماعت جولائی دے اخیری ہفتے تئیں ملتوی کرڈتی ۔ منگل کوں عدالت عالیہ دے جسٹس محسن اختر کیانی اتے جسٹس میاں گل حسن اور نگزیب درخواست گزار محمد نواز شریف ،مریم نواز اتے کیپٹن (ر)محمد صفدر ولوں ڈتیاں گیاں ترائے درخواستاں اُتے سماعت کیتی ۔ ایں موقعے تے مجرم محمد نواز شریف ولوں انہاں دے وکیل خواجہ حارث ایڈوکیٹ جڈانجو مریم نواز اتے کیپٹن (ر)محمد صفدر ولوں امجد پرویز ایڈوکیٹ عدالت اچ پیش تھئے ۔ سماعت دے موقعے تے عدالت العزیزیہ سٹیل ملز اتے فلیگ شپ ریفرنس ڈوجھیاں عدالتاں اچ منتقل کرنڑ دی درخواست اُتے نیب کوں نوٹس جاری کریندے ہوئیں جواب منگ گھدے ۔ عدالت محمد نوازشریف، مریم نواز اتے کیپٹین ریٹائرڈ محمد صفدر دیاں اپیلاں اُتے وی نیب کوں نوٹس جاری کریندے ہوئیں جواب منگ گھدے ۔ عدالت مجرماں ولوں سزاواں معطل کرنڑ بارے درخواست اُتے اسیکیوٹر جنرل نیب کو ںجولائی دے اخیری ہفتے سڈ گھدے ۔ لعزیزیہ سٹیل ملز اتے فلیگ شپ ریفرنس دی منتقلی بارے درخواست اُتے سابق وزیر اعظم محمد نواز شریف دے وکیل خواجہ حارث دلائل ڈتے جو ایون فلیڈ ریفرنس اچ سزا سنڑاونڑ دے بعد ٹرائل کورٹ دے جج آپنڑاں ذہن واضح کر ڈتے ، تریہے ریفرنس اچ دفاع سانجھا ہے ایں سانگے جج محمد بشیر بئے ڈو ریفرنسز اُتے سماعت اگوں کائنی ودھا سگے ، خواجہ حارث ڈسایا جو فاضل جج محمد بشیر ڈو ریفرنسز بارے ہائیکورٹ کو ںخط وی لکھے ۔ سماعت دے دوران فاضل جسٹس محسن اختر کیانی ریمارکس ڈتے جو خط دا معاملہ انتظامی ہے ایں کوں معزز چیف جسٹس ڈیکھسن ، اساں ایندے اُتے فیصلہ ڈیونڑے جیہڑی درخواست اساڈے سامنڑیں ہے ۔ سزا دے خلاف اپیلاں اُتے دلائل ڈیندے ہوئیں خواجہ حارث موقف اختیار کیتا جو عدالت فلیٹس دی اصل قیمت جانڑے بغیر سزا سنڑا ڈتی ہے ، عدالت اچ پیش کیتی گئی ٹائٹل رجسٹری اُتے وی فلیٹس دی قیمت خرید درج کائنی ، ظاہر آمدن اتے اثاثیاں بارے جیہڑا چارٹ پیش کیتا گئے ایندے بارے تفتیشی افسر کوں پتہ ہی کائناں ہئی جو اے کہیڑے دستاویزات دی بنیاد اُتے اتے کئیں تیار کیتے ۔ خواجہ حارث ایڈوکیٹ آکھیا وج واجد ضیاءتسلیم کیتے جو محمد نوازشریف ولوں بالیں کوں رقم دی فراہمی بارے کئی ثبوت کائنی ۔ عدالت سابق وزیر اعظم محمد نوازشریف ،مریم نواز اتے کیپٹن ریٹائرڈ محمد صفدر دیاں ساریاں اپیلاں اُتے سماعت جولائی دے اخیری ہفتے تئیں ملتوی کرڈتی ۔
