اسلام آباد ۔ 26جولائی (اے پی پی) پاکستان تحریک انصاف دے چیئرمین عمران خان الیکشن جیتنڑ تے پاکستان تحریک انصاف دے چیئرمین عمران خان خوش ہین، قوم نال اپنڑے پہلے خطاب اچ عمران خان ملک اچ قانون دی بالا دستی،ہر کہیں دا احتساب،ملک کوں ریاست مدینہ جھیاں بنڑاونڑاتے سیاسی انتقام نہ گھنڑ دا عزم کیتے۔ انہاں سرکاری خرچے گھٹ کرنڑ،وزیراعظم اتے گورنر ہاوسز کوں عوامی مقصد کیتے استعمال کرنڑدا اعلان کریندے ہوئیں آکھیے جو 22 سال دی جدوجہد رنگ گھن آئی اے، نواں پاکستان بنڑاونڑ دا خواب پورا کرنڑ دا موقع مل گئے،عوام دے پیسے دی حفاظت کریسوں، ٹیکس چوری نہ تھیونڑ ڈیسوں ، گورننس چنگی کر ڈکھیسوں جڈاں جو خطے دی ترقی اتے امن کیتے بھارت، امریکا ، افغانستان سودھے ہمسایہ ملکاں اتے عالمی برادری نال چنگے تعلقات بنڑاونڑ تے توجہ ڈتی ویسی۔ انہاں مقبوضہ کشمیر اچ بھارتی مظالم دو انگل چیندے ہوئیں مسئلہ کشمیر تے بھارت کوں مذاکرات دی دعوت وی ڈتی اے۔الیکشن جیتنڑ تے اللہ دا شکر منگدے ہوئیں عمران خان دا آکھنڑ ہا جو اج نواں پاکستان بنڑاونڑ دا موقع ملیے ، اپنڑے مخالفین کوں معاف کرینداں ، ساڈی حکومت کہیں دے خلاف سیاسی انتقامی کارروائی نہ کریسی،غریب ملک اچ شاہانہ وزیراعظم ہاو ¿س چنگاں نئیں لگدا، ایکوں عوام کیتے استعمال کریسوں۔انہاں سیاسی حریفاں کوں پیشکش کیتی جو جتھاں وی دھاندلی دا شبہ اے اتھاں سارے حلقے کھولیسوں اتے اپوزیشن دے خدشات مُکائے ویسن اتے گورننس دا نظام وی ٹھیک کر ڈکھیسوں۔ عمران خان افغانستان ، ایران اتے سعودی عرب دے نال نال مشرق وسطیٰ نال چنگے تعلقات،امریکا نال متوازن روابط اتے جنگاں دی بجائے صلح جوئی دا عزم کریندے ہوئیں بھارت نال تعلقات دی چنگائی اتے مسلہ کشمیر تے مذاکرات ٹورنڑ دی گالھ کیتی۔انہاں آکھیے جو اقتدار ملنڑ توں بعد اپنڑے منشور تے عملدرآمد یقینی بنڑیسوں،کہیں تے اتنی تنقید نئیں تھئی جیہڑی میڈے تے کیتی گئی اے بھل میں ساریں کوں معاف کرینداں ،چاہنداں جو پاکستان متحد ہووے ، قوم دعا کرے جو اللہ میکوں اپنڑے وعدے پورے کرنڑ دی توفیق ڈیوے۔
