اسلام آباد ۔ 23 جولائی (اے پی پی) پاور ڈویژن این پی سی سی اتے ساریاں تقسیم کار کمپنیاں کوں 25 جولائی کوں پورے ملک اچ پولنگ دے دوران اتے ووٹاں دی گنتی پوری تھیونڑ تئیں بلا تعطل بجلی فراہمی دی ہدایات ڈے ڈتیاں۔ سنوار کوں جاری بیان دے مطابق پاور ڈویژن پولنگ دے ڈینھ بجلی دی بلاتعطل فراہمی دی نگرانی سانگے ڈو کنٹرول سنٹربنڑ ڈتن۔ ہک کنٹرول سنٹر اسلام آباد تے ڈوجھا لاہور ہوسی۔ اسلام آبادکنٹرول روم دی سربراہی ایڈیشنل سیکر ٹری وسیم مختار جڈاں جو لاہور دے کنٹرول روم ایڈیشنل سیکر ٹری ڈاکٹر عامر احمد کریسن۔ سیکرٹری پاور ڈویژن رضوان میمن سارے ملک دی صورت حال خود ڈیکھسن جڈاں جو وزیر توانائی سید علی ظفر کوں وی بجلی دی صورتحال بارے ڈسایا ویسی ۔ ہر بجلی تقسیم کار کمپنی اپنڑے ہیڈکوارٹر اچ مانیٹرنگ روم بنڑائے جیں اچ متعلقہ اپریشن ڈائریکٹر پولنگ دے ڈینھ موجود ہوسن۔سارے سب ڈویژن لیول تے ایمرجنسی سٹاف اتے ٹیمیاں وی بنڑایاں گن تاں جو کہیں وی فنی خرابی کوں وختی ٹھیک کیتا ونجے ۔
