اسلام آباد ۔14 جولائی(اے پی پی)قومی ایئر لائن حج آپریشن دا باقاعدہ شروع کر ڈتے۔ سرکاری سکیم تحت کامیاب تھیونڑ آلے 327 حاجیاں کوں گھن تے پی کے7003فلائٹ اسلام آباد توں مدینہ منورہ سانگے روانہ تھی گئی۔ وزارت مذہبی امو حکام مطابق قومی ایئر لائن ”پی آئی اے“ باقاعدہ حج آپریشن شروع کر ڈتے، پہلی فلائٹ جناح انٹرنیشنل ایئرپورٹ کراچی توں پی کے7001 ،300 توں ودھ حاجیاں کوں گھن تے مدینہ شریف سانگے روانہ تھئی جڈاں جو پی آئی اے دی ڈوجھی حج فلائٹ پی کے7003 کوں اسلام آباد توں 327 حاجیاں کوں گھن تے مدینہ شریف سانگے روانہ کیتا گئے۔ فلائٹ توں پہلے حاجیاں کوں مناسک حج اتے سعودی قنون بارے ڈسایا ۔ ایں موقع تے سعودی سفارتخانے دے ڈپٹی ہیڈ مشن حبیب اللہ بخاری آکھیا جو سعودی حکومت حاجیاں سانگے چنگیاںسہولتاں ڈیونڑ دیاں کوششاں کریندی پی ہے ۔ سعودی سفیر ایں موقع تے مکہ مدینہ ونجنڑ آلے پاکستانی حاجیاں کوں مبارخ ڈتی۔ وزارت مذہبی امور دے کیپٹن(ر) آفتاب احمد آکھیا جو وزارت مذہبی امور ولوںپاکستانی عازمین سانگے ہر سال آلی کار ایں سال وی چنگے انتظام کیتے گن۔ انہاں حاجیاں کوں مخاطب کریندے ہوئیں آکھیا جو تساں پاکستان دے سفیر ہیوے ، سعودی عرب اچ تساں اپنڑی زبان اتے اخلاق نال ا یہ ثابت کرنا ہے جو پاکستانی چنگی قوم ہیں۔ وزارت مذہبی امور قرعہ اندازی اچ کامیابی دے بعد روانگی تئیں دی ساریاں معلومات ایس ایم ایس پیغام دے ذریعے سارے حاجیاں کوںڈیندی پی ہے۔ اسلام آباد ایئرپورٹ توں روانہ تھیونڑ توں پہلے حاجیاں اپنڑیں عبادتاں دی قبولیت دے نال نال ملک اتے قوم دی ترقی اتے پاکستان اچ امن سانگے اجتماعی دعا منگی۔
