اسلام آباد ۔ 20 جولائی (اے پی پی) نگراں وزیراعلیٰ پنجاب ڈاکٹر حسن عسکری آکھے جو ملک اچ آزادانہ‘ منصفانہ اتے شفاف انتخابات کراونڑ سانگے حکومت الیکشن کمیشن آف پاکستان نال پورا تعاون کریسی ۔ ہک نجی ٹی وی چینل دے پروگرام اچ الیندے ہوئیں انہاں آکھیا جو انتخابات کراونڑاں الیکشن کمیشن دا کم ہے،اساں صرف معاونت کریندے پئے ہئیں۔ انہاں آکھیا جو کہیں نال وی وانجھ دے معاملے اُتے انتخابی امیدواراں کوں نگران حکومت نال شکایت کرنڑیں چاہیدی ہے جو ذمہ دار عناصر دے خلاف کارروائی کریسی ۔ انہاں بیا آکھیا جو ضابطہ اخلاق دی خلاف ورزی اُتے وی نگراں حکومت کارروائی کریسی ۔ محمد نواز شریف بارے کیتے گئے ہک سوال دے جواب اچ انہاں آکھیا جو پاکستان مسلم لیگ (ن) دے رہنما کوں نیب لاہورہوائی اڈے توں گرفتار کیتا کیونجو نیب ہی محمد نواز شریف دا معاملہ ٹریندی پئی ہئی ، پنجاب دی نگران حکومت ایں موقعے تے صرف سکیورٹی دے انتظامات کیتے ۔
